Astanada júrgizýshi kýálikterin alyp berýdi ýáde etken alaıaq ustaldy

NUR-SULTAN. QazAqparat – Astananyń polıtsııa qyzmetkerleri 4 azamattyń aryzy negizinde Ózbekstanda týǵan elorda turǵynyn alaıaqtyq babymen ustady, dep habarlaıdy QazAqparat tilshisi.

«Saryarqa» aýdanynyń polıtsııa basqarmasyna 4 azamat «júrgizýshi kýáligin alyp beremin» dep aqsha alǵan adamnyń ústinen aryz jazdy. Krımınaldyq polıtsııa qyzmetkerleri jedel-izdestirý is-sharalary kezinde elordada turatyn Ózbekstan Respýblıkasynyń 32 jastaǵy týmasyn ustady.

Tergeý barysynda anyqtalǵandaı, ustalǵan azamat júrgizýshi kýáligin tıisti emtıhan tapsyrmaı-aq alyp beretini týraly ýáde bergen. Aqysyna jábirlenýshilerden túrli somada aqsha suraǵan. Aqsha depozıtke túsken soń kúdikti baılanysty úzip otyrǵan», - dep jazady Nur-Sultan qalasy Polıtsııa basqarmasynyń baspasóz qyzmeti.

Polıtsııa ókilderiniń málimeti boıynsha, kúdikti kinásin moıyndaǵan. Endi onyń osyǵan uqsas basqa qylmystarǵa qatysy bar-joǵy tekserilip jatyr.

«Atalǵan fakti boıynsha QR Qylmystyq kodeksiniń 190-babymen («Alaıaqtyq») qylmystyq is qozǵaldy.

Polıtsııa departamenti azamattardy alaıaqtyqtyń jıilep ketken faktileri týraly eskertedi jáne qaskúnemderdiń aıla-amaldaryna boı aldyrmaýǵa, beıtanys adamdarǵa senbeýge, aqshany, baǵaly zattardy, sondaı-aq bank shottary men kartalarynyń tsıfrlyq derekterin eshkimge bermeýge shaqyrady», - delingen polıtsııa taratqan málimette.