Astanada JI jazǵan spektakl sahnalanady

ASTANA. KAZINFORM — Jaqynda Ázirbaıjan Mámbetov atyndaǵy memlekettik drama jáne komedııa teatrynda jasandy ıntellekt jazǵan qoıylym sahnalanbaq. Bul týraly qoıylym rejısseri «Búgin LIVE» baǵdarlamasyna bergen suhbatynda habarlady.

— JI-di qoldaný arqyly stsenarıı jazý, dástúrli teatr men qazirgi jańashyldyqty biriktirý ıdeıasy eń alǵash bir jyl buryn týdy. Ádiljan Maǵzumov degen ákimshi jigit bolatyn. Sol kelip: «Jasandy ıntellektpen spektakl jazsaq qalaı bolady?!» — dep surady. Sodan soń jarty jyl kóleminde qalaı jazsaq, qalaı keltirsek dep oılanyp júrdim. Solaı oıymyz pisip, aqyryndap jumys istep kele jatyrmyz, — deıdi Nurjigit Mýslımov.

Jasandy ıntellekt qoıylymnyń barlyq bóligine kómektesip jatqan kórinedi.

— JI bizge spektakldiń qurylymyn jasaýǵa kómektesip jatyr. Qoıylym qoıý úshin eń birinshi stsenarıı jazylýy kerek. Pesany jazý úshin ChatGPT-ge barlyq talaptardy aıtamyz: maǵan ne kerek, qaı ýaqytta bolyp jatqan oqıǵa, qandaı keıipkerler qajet. Ol sol nusqaýlar arqyly meniń qalaýymdaǵy stsenarııdi jazyp beredi. Biz sol stsenarııdi akterlermen oqımyz. Keıin JI bizge mýzykasyn da jazyp beredi. Sahnalyq qurylymyna, kostıýmderge kómektesedi. Eń basty artyqshylyǵy — bul ýaqytty únemdeıdi. Aptalap, aılap jasalatyn jumysty ChatGPT ary ketse jarty saǵattyń ishinde daıyndaıdy. Biz onyń daıyndaǵan materıaldaryn óńdep shyǵamyz, — deıdi rejısser.

Qoıylym qarasha aıynyń ortasynda sahnalanbaq.

— Nátıjesi jaqsy sııaqty. Ózimizdiń kóńilimizden shyǵyp jatyr. Biraq unamaıtyn tustary da bar. Ony protsess barysynda jóndep otyrmyz. Buıyrsa, premera qarasha aıynyń 15–16 juldyzynda bolady, — dedi ol.

Aıta keteıik, Kazinform tilshisi aldaǵy kúnderi nazar aýdarýǵa turarlyq fılmderdi tizip shyqty.