Astanada jyl sońyna deıin taǵy 9 mektep ashylady

ASTANA. KAZINFORM — Astana ákimi Jeńis Qasymbek Instagram paraqshasynda jyl sońyna deıin qalada taǵy 9 jańa mektep ashylatynyn málim etti, dep habarlaıdy elorda ákimdiginiń resmı saıty.

«Osy jyldyń sońyna deıin taǵy 9 mektep ashýdy josparlap otyrmyz. Olardyń segizi – Memleket basshysynyń «Jaıly mektep» ulttyq jobasy aıasynda salynǵan mektepter, taǵy bireýi – jeke mektep. Atalǵan toǵyz mektep eki aýysymda taǵy 30 myńnan astam oqýshy ornyn ashýǵa múmkindik beredi.

Máselen, Esil aýdanynda 4 mektep ornalasady, Nura aýdanynda – 3 mektep, Almaty aýdanynda – 2 mektep. Qalany aralaý barysynda birqatar oqý ornynyń qurylysymen tanystym. Bul mektepterdiń arqasynda 3 aýysymdy 4 mekteptiń jáne tyǵyzdalyǵy joǵary 3 mekteptiń qıyndyǵy sheshiledi.

Oqý jylynyń basynda biz 15 jańa mektep ashtyq. Jańa mektepterdiń arqasynda 3 aýysymda oqytý júrgizilgen 5 mekteptiń jáne tyǵyzdylyǵy joǵary 4 mekteptiń qıyndyǵy sheshildi.

Biz sol sııaqty aldaǵy jyldarǵa da daıyndalyp otyrmyz. 2025 jyly taǵy 20-dan astam mektep salyp, paıdalanýǵa berýdi josparlap otyrmyz», - dep jazdy elorda ákimi.