Astanada jastar saıasaty baǵytynda qandaı is-sharalar atqarylyp jatyr

ASTANA. KAZINFORM – Elordada jastardyń bastamalaryn qoldaý, olardyń áleýetin ashý jáne azamattyq ustanymyn qalyptastyrý baǵytynda memlekettik jastar saıasaty júıeli ári josparly túrde júzege asyrylyp keledi.

Astana qalasynyń Jastar saıasaty máseleleri basqarmasy jyl basynan beri bilim berý, jumyspen qamtý, volonterlik qozǵalys, patrıottyq tárbıe jáne salaýatty ómir saltyn nasıhattaý syndy negizgi baǵyttardy qamtıtyn birqatar aýqymdy jobalardy iske asyrdy. Bul týraly Astana qalasynyń Jastar saıasaty máseleleri basqarmasynyń basshysy Samat Ibraev Kommýnıkatsııalar qyzmetinde ótken brıfıngte málim etti.

Basqarma basshysynyń aıtýynsha, búginde Astanada 481 myńnan astam jas turady.

Bıyl elordada 4 jańa JOO ashyldy: Cardiff University fılıaly, MGIMO fılıaly, Abaı atyndaǵy ulttyq pedagogıkalyq ýnıversıtetiniń fılıaly, Sátbaev atyndaǵy ulttyq tehnıkalyq ýnıversıtettiń fılıaly.

Qaladaǵy 20 joǵary oqý ornynda 115 myń stýdent bilim alady. Olardyń jaıly turýy úshin 25 myń orynǵa arnalǵan 70 jataqhana jumys isteıdi.

Jastardy jumyspen qamtý – negizgi basym baǵyttardyń biri. Qalada «Jastar tájirıbesi», «Qoǵamdyq jumystar» jáne «Alǵashqy jumys orny» jobalary turaqty túrde júzege asyrylýda.

«Ulttyq statıstıka bıýrosynyń dereginshe, 2025 jyly NEET sanatyndaǵy jastardyń úlesi 6,2% nemese 28 myń adamdy quraıdy.

Jastardyń eńbek belsendiligin arttyrý maqsatynda 35 bos jumys orny jármeńkesi ótkizilgen. Jazǵy maýsymda «Jasyl el» jobasy boıynsha 5200 jas jumyspen qamtyldy.

Sonymen qatar «JOLTAP» jobasy aıasynda jastar SMM, targetıng, grafıkalyq dızaın sııaqty 7 tsıfrlyq baǵyt pen tiginshi, barısta, býhgalter sekildi 11 jumysshy mamandyǵyn meńgerýde.

2025 jyldyń sońyna deıin 5300 adam jumysshy mamandyǵy boıynsha, 2700 adam tsıfrlyq baǵyttar boıynsha oqytylady dep josparlanyp otyr», – deıdi Samat Ibraev.

Onyń aıtýynsha, ekologııalyq mádenıetti qalyptastyrýǵa erekshe kóńil bólinýde. «Taza Qazaqstan» respýblıkalyq aktsııasy aıasynda eriktilerdiń, stýdentterdiń jáne qala turǵyndarynyń qatysýymen aýqymdy jumys júrgizildi.

Jalpy qamtý 100 myńnan astam adamdy qurady. Spıkerdiń málimetinshe,«Zań jáne tártip» jobasy aıasynda esirtki jarnamasyna qatysty jazýlardy boıaý boıynsha turaqty reıdter jáne tanymal blogerlermen birge sporttyq jattyǵýlar ótkizilip keledi.

«ESIRTKISIZ ELORDA» jobasy aıasynda trenıngter, sporttyq týrnırler, podkasttar, shyǵarmashylyq baıqaýlar jáne ımıtatsııalyq sot protsesteri uıymdastyrylady.

Internet keńistiginde esirtki zattarynyń zańsyz satylymyna monıtorıng júrgizilip, áleýmettik jeliler men marketpleısterde 12 myńnan astam paraqsha tekserildi.

Volonterlik qozǵalys – jastar saıasatynyń negizgi baǵytynyń biri. Elordada 50 volonterlik uıymdy biriktiretin front-ofıs jumys isteıdi, olardyń 30-y belsendi túrde qyzmet atqaryp otyr. Jalpy volonterler sany – shamamen 6000 adam.

Jyl saıyn olar halyqaralyq, respýblıkalyq jáne qalalyq deńgeıdegi 150-den astam is-sharaǵa qatysady. Patrıottyq tárbıe baǵytynda «Jas sarbaz» jobasy júzege asýda.

Onyń aıasynda erlik sabaqtary, ardagerlermen kezdesýler, fılm kórsetilimderi jáne patrıottyq ánder baıqaýlary ótkiziledi. Qazirgi tańda 63 mektepte jáne 14 kolledjde «Jas sarbaz» synyptary men klýbtary ashylyp, 3000-nan astam jas tárbıelenýde.

Elordada 30 jastar uıymy belsendi jumys atqaryp, áleýmettik jaýapty jáne bastamashyl jastardy biriktirýde. Bul jobalar jastardyń qoǵamdyq belsendiligin arttyryp, olardyń qoǵam ómirine qatysýyn keńeıtip, ózin-ózi damytý múmkindikterin kóbeıtýde.

Jastar saıasatynyń mańyzdy baǵyty – otbasy ınstıtýtyn nyǵaıtý. «Otbasy – baqyt mekeni» jobasy aıasynda jas otbasylarǵa arnalǵan sheberlik saǵattary, sporttyq estafetalar, baıqaýlar jáne trenıngter ótkiziledi.

Ásirese, dástúrli otbasylyq qundylyqtardy dáripteıtin «Eń úzdik jas otbasy» baıqaýy erekshe tanymal. Bul joba jaýapty ata-analyq mádenıetti damytýǵa jáne otbasylyq berekeni nyǵaıtýǵa yqpal etedi.

Aıta keteıik, Astanada jyl basynan beri 14 myńnan astam adam jumysqa ornalastyryldy.