Astanada jańa jumys kestesi qashan bekitiledi

ASTANA. KAZINFORM – Astana qalasy máslıhatynyń tóraǵasy Tabıǵat Zeınulqabden elordadaǵy uıymdardyń jumys ýaqyty kestesin ózgertýge qatysty pikir aıtty.

– Ákimdikte memlekettik qyzmetshiler men basqa da uıymdardyń jumys kestesin ózgertý týraly másele qaralyp jatyr. Bul kólik júktemesin azaıtý úshin qajet. Qalada tańerteń jáne keshke qarbalas ýaqytta kólik keptelisi paıda bolady, ásirese sol jáne oń jaǵalaý arasynda júrý óte qıyn. Qazir jumys kestesi pysyqtalyp jatyr. Keıbireýinde sál erterek bastalsa, basqalarynda jumysy sál keıinirek bastalýy múmkin. 2014-2015 jyldary osy tájirıbe qoldanylǵan edi. Jaqyn arada tıisti sheshimdi qabyldaımyz, - dedi T.Zeınulqabden Parlament Májilisiniń jalpy otyrysynan keıin tilshiler suraǵyna jaýap bere otyryp.

Sonymen qatar qalalyq máslıhat tóraǵasy «Astanadaǵy jumys kestesi qysqartyla ma?» degen saýalǵa jaýap berdi.

- Jumys ýaqyty qysqarmaıdy, tek jumys kestesi retteledi. Segiz saǵattyq jumys kestesi saqtalady, biraq keıbiri qyzmetine erterek kirisedi, – dedi ol.

Munymen qosa Tabıǵat Zeınulqabden qaladaǵy jumys kestesin ózgertý qarbalas ýaqytta joldardaǵy keptelisti joıýǵa septigin tıgizetinin aıtty.

– Jumys ýaqytyn qysqartýmen keptelis máselesi sheshilmeıdi. Biraq kesteni 1-1,5 saǵatqa ózgertý eleýli túrde áser etedi dep oılaımyn, - dedi máslıhat tóraǵasy.

Buǵan deıin elordada ortalyq atqarýshy organdardyń jumys ýaqyty ózgerýi múmkin ekenin jazǵan edik.