Astanada jańa Ulttyq ǵylymı onkologııalyq ortalyq qashan salynady
«Qazirgi kezde kadrlardy irikteý júrip jatyr jáne olardyń biliktiligin arttyrýǵa bıýdjetten qarjy qarastyryldy. Bizde barlyq memlekettik organdarmen bekitilgen jol kartasy bar. Qurylys jumystaryn aıaqtaý 2020 jyldyń jeltoqsanyna josparlanǵan», - dedi mınıstr.
Onyń sózine qaraǵanda, osyndaı ortalyqtardy ashý boıynsha ózge elderdiń tájirıbeleri eskerildi.
«Máselen, Nıý-Iorkte protondyq ortalyq ashylýda. Olar eki jyl buryn ózderiniń kadrlaryn basqa ortalyqtarda oqytýdy bastady. Keıinnen bul mamandar ózderiniń ortalyqtaryna qaıta keledi. Bizdiń seriktesterdiń qatysýymen osy tehnologııalarmen jumys isteımiz», - dedi Eljan Birtanov.
Eske salsaq, Elbasy bıylǵy 5 qazanda el halqyna arnaǵan kezekti Joldaýynda 2019 jyly Astanada Ulttyq ǵylymı onkologııalyq ortalyqtyń qurylysyn bastaýdy tapsyrdy.
Ortalyq elimiz halqyn bastapqy kezeńdegi dagnostıkanyń óte tıimdi ári joǵary tehnologııalyq ádisterimen jáne qaterli isikter óskinderin úzdik halyqaralyq tájirıbeler negizinde emdeýmen qamtamasyz etýge baǵyttalǵan.
Ortalyqta jyl saıyn joǵary tehnologııalyq medıtsınalyq qyzmetti qoldana otyryp, statsıonarlyq kómek jaǵdaıynda 6 myń jáne ambýlatorlyq jaǵdaıda 30 myńnan asa naýqas medıtsınalyq kómek alatyn bolady. Zamanaýı sáýle terapııasy qyzmeti 4 myń patsıentke kórsetiledi. Sol sııaqty, 10 myń naýqas ıadrolyq medıtsınanyń kómegimen onkologııalyq aýrýlardy dıagnostıkalaý jáne emdeý múmkindigin alady.