Astanada jańa týǵan balany zańsyz bergeni úshin anasy ata-ana quqyǵynan aıyryldy
ASTANA.KAZINFORM - Astana qalasynyń prokýratýrasy jańa týǵan balany zańsyz berý faktisi boıynsha qylmystyq is boıynsha memlekettik aıyptaýdy qoldaýdy qamtamasyz etti.
Anyqtalǵandaı, elordanyń 19 jastaǵy turǵyny deldaldar arqyly júktiliktiń segizinshi aıynda jasalǵan jalǵan sýrrogat ana bolý sharty negizinde óziniń jańa týǵan balasyn erli-zaıypty jupqa aqshalaı syıaqy úshin bergen.
Sottyń 2025 jylǵy 23 mamyrdaǵy úkimimen qyz jáne deldaldar Qazaqstan Respýblıkasy Qylmystyq kodeksiniń 135-baby («Kámeletke tolmaǵandar saýdasy») boıynsha kináli dep tanyldy. Sottalýshylarǵa probatsııalyq baqylaý belgilene otyryp, shartty túrde 8 jyl bas bostandyǵynan aıyrý jazasy taǵaıyndaldy.
- Balanyń quqyqtary men zańdy múddelerin qorǵaý maqsatynda ol kámeletke tolmaǵandarǵa arnalǵan mamandandyrylǵan mekemege ornalastyryldy. Sonymen qatar, Astana qalasy ákimdiginiń «Mamandandyrylǵan balalar úıi» KMM-niń talap-aryzy boıynsha anasy ata-ana quqyqtarynan aıyryldy, - delingen habarlamada.
Astana qalasynyń prokýratýrasy balalarǵa qatysty zańsyz mámileler qylmystyq jaýaptylyqqa ákep soǵatynyn jáne quqyq qorǵaý organdarynyń erekshe baqylaýynda ekenin eske salady.
Osyǵan deıin Aqmola oblysynda sýrrogat ana sátsiz júktilik úshin aqshany qaıtaratyn boldy.
