Astanada jańa ındýstrııalyq park pen AI-júıe salynady

ASTANA. KAZINFORM — Qazaqstanda memlekettik-jekemenshik áriptestik (MJÁ) jobalary shaǵyn áleýmettik nysandardan iri ınfraqurylymdyq jobalarǵa aýysyp keledi. Bul týraly Ortalyq kommýnıkatsııalar qyzmetinde ótken brıfıngte Qazaqstandyq MJÁ ortalyǵynyń basqarma tóraǵasy Aslan Qalıǵazın málimdedi.

Ortalyq málimetinshe, sońǵy jyldary elde 3,6 trln teńge somasyna 1 257 memlekettik-jekemenshik áriptestik jáne kontsessııalyq kelisimshart jasalǵan. Onyń ishinde 697 kelisimshart áli qoldanylyp keledi, 411 joba tolyq aıaqtalǵan, al 149 kelisimshart buzylǵan.

— Tek 17 joba respýblıkalyq deńgeıge jatady, olardyń jalpy quny 1,8 trln teńgeni quraıdy. Qalǵan 1 240 bastama jergilikti mańyzǵa ıe, olardyń jıyntyq quny 1,7 trln teńgeden asady. Jasalǵan kelisimsharttardyń 88%-dan astamy bilim berý, densaýlyq saqtaý, áleýmettik qyzmetter, energetıka jáne turǵyn úı-kommýnaldyq sharýashylyq salalaryna tıesili. Qarjylandyrýdyń 27%-y kólik jáne ınfraqurylymdyq qurylys jobalaryna tıesili, — dedi Aslan Qalıǵazın.

Ortalyq basshysynyń aıtýynsha, 2022 jyldan bastap jobalar sany azaıǵanymen, bir jobanyń ortasha quny ósip otyr. Qazirgi portfeldiń negizgi bóligin ındýstrııalyq parkter, kópbeıindi aýrýhanalar, ıadrolyq medıtsına ortalyqtary, kóshe jaryqtandyrý júıeleri jáne jasandy ıntellekt negizindegi jobalar quraıdy.

Aslan Qalıǵazın 2025 jyly Astana qalasynda iske asyrylatyn eki iri jobany erekshe atady. Birinshisi — «Astana-Tehnopolıs» arnaıy ekonomıkalyq aımaǵynda quny 126,5 mlrd teńge bolatyn №2 ındýstrııalyq park. Ekinshisi — quny 90 mlrd teńge bolatyn jasandy ıntellekt negizindegi qalalyq ınfraqurylymdy basqarý júıesi.

— Bul júıe qoldanystaǵy «Sergek» júıesiniń ornyn basady. Joba sheńberinde úlken derekter aǵyndaryn taldaýǵa arnalǵan jańa quraldardy engizý kózdelip otyr, bul ýaqtyly áreket etýge, yqtımal oqıǵalardyń aldyn alýǵa múmkindik beredi, — dedi ol.

Buǵan deıin elimizde endigi ýaqytta memlekettik-jekemenshik áriptestik sharty tek konkýrstyq negizde jasalatyny týraly habarlaǵan edik.

Byltyr elimizde memlekettik-jekemenshik áriptestik jobalaryn daıyndaý qorlary qurylatyny belgili boldy.