Astanada jańa dzıýdo ortalyǵy ashyldy
ASTANA. KAZINFORM – Elordanyń jańa «Nura» aýdanynda «Kodokan Spirit» atty kóp fýnktsıonaldy sport kesheniniń ashylý saltanaty ótti.
Astana qalalyq sport basqarmasy málim etkendeı, buqaralyq sportty damytý jáne jas urpaqty salaýatty ómir saltyna baýlý maqsatynda Qazaqstanda ekinshi «Kodokan Spirit» kóp fýnktsıonaldy sport kesheni iske qosyldy.
Buǵan deıin alǵashqy ortalyq 2021 jyly Oral qalasynda ashylǵan bolatyn.
Aýmaǵy 1200 sharshy metrdi quraıtyn ǵımaratta bir mezette 1000-ǵa jýyq jas sportshylar dzıýdomen aınalysa alady. Zal 180 oryndyqpen, olımpıadalyq sapaly japon tatamı tósenishterimen, zamanaýı jeldetý jáne jaryqtandyrýmen jabdyqtalǵan. Sondaı-aq sport kesheninde toptyq sabaqtarǵa arnalǵan eki shaǵyn bólme, ata-analarǵa arnalǵan yńǵaıly kútý alańy jáne ataqty Oneshott brendiniń kofehanasy bar.
Ashylý saltanatyna Astana qalasy ákiminiń orynbasary Eset Baıken, Astana qalasynyń Dene shynyqtyrý jáne sport basqarmasynyń basshysy Vasılıı Levıt arnaıy qatysty.
«Qazirgi tańda elordada dzıýdomen aınalysyp júrgen jastar kúnnen-kúnge artyp keledi. Jalpy qalada 3500 eresek jáne jasóspirimder dzıýdomen belsendi aınalasýda. 290 dzıýdoshy kásibı turǵyda shuǵyldanady.
Qala ákimdigi sportshylardy qoldaý maqsatymen Astanada alǵashqy dzıýdo ortalyǵyn ashýda! Bolashaqta Olımpıada oıyndarynda altyndy áperetin, elimizdiń abyroıyn asqaqtatar jerlesterimiz osy jerden shyǵatynyna senemin!» — dep, Astana qalasynyń ákiminiń orynbasary Eset Baıken úlken úmit kútetindigin jetkizdi.
Shyndyǵynda da, dzıýdodan elimizde alǵashqy álem chempıony ataǵyna 2009 jyly 100 keli salmaqta Maksım Rakov qol jetkizse, Olımpıada oıyndarynda Ashat Jıtkeev, Eldos Smetov, Galbadrahyn Otgontsetseg kúmis, qola medal jeńip aldy. Alaıda dzıýdo sportyna degen qyzyǵýshylyq joǵary bolǵanymen, Olımpıada chempıony ataǵy buıyrmaı keledi.
Dzıýdo sportynyń mamany Jandos Qonysbaevtyń aıtýynsha, 25 jyl ishinde Astana qalasynda dzıýdo sektsııalary ár jerde kishigirim ǵana bolsa, endi olardyń basyn biriktirý múmkindigi berildi.
Bir ereksheligi, Astana qalasy dzıýdo federatsııasynyń prezıdenti Ǵaısa Jumaǵalıev bul keshendi memlekettiń bıýdjetimen emes, ınvestıtsııalyq jobanyń arqasynda ashty.
