Astanada zeınetkerler úshin pılates úıirmesi ashyldy

ASTANA. KAZINFORM — Jattyǵýlar bulshyqetterdi nyǵaıtyp, býyndardyń qozǵalysyn jeńildetip, dene ıkemdiligin arttyrýǵa baǵyttalǵan, dep habarlaıdy elorda ákimdiginiń resmı saıty.

Belsendi uzaq ómir súrý ortalyǵy aǵymdaǵy jyly saýyqtyrý baǵytyndaǵy jańa qyzmet túrin qosyp, pılates úıirmesin uıymdastyrýdy qolǵa aldy. Atap aıtqanda, pılates úıirmesi Almaty aýdanynda qyrkúıek aıynan bastap, al Saraıshyq aýdanynda qarasha aıynan bastap júrgizile bastady.

Úıirmeni júrgizý úshin ortalyqtyń 3 sporttyq nusqaýshysy arnaıy daıyndyqtan ótti. 

Qazirgi ýaqytta Belsendi uzaq ómir súrý ortalyǵynyń 30-ǵa jýyq zeınetkeri pılates sabaǵyna turaqty qatysyp, óz densaýlyqtaryn jaqsartyp jatyr. 

— Bul eń aldymen, zeınetkerlerdiń densaýlyǵy úshin mańyzdy. Egde jastaǵy adamdar úshin eń úlken qaýipterdiń biri — tepe-teńdikti joǵaltyp, qulap qalý. Jattyǵýlar durys tynys alýǵa, tepe-teńdikti saqtaýǵa, eń bastysy denege ǵana emes, kóńil-kúıge de oń áser etedi. Sol sebepti bul áleýmettik jobany qolǵa alyp otyrmyz, aldaǵy jyly taǵy da eki aýdanda pılates úıirmesin ashý josparda bar, — deıdi Perspektıvti damý jáne áleýmettik jobalar bóliminiń mamany Aınash Ýálıeva.

Budan buryn «Azamattarǵa arnalǵan úkimet» Memlekettik korporatsııasy qazaqstandyq zeınetkerler eń kóp turatyn óńirlerdiń top-10 tizimin jarııalady.