Astanada zaǵıp balalarǵa arnalǵan alǵashqy túzetý ortalyǵy ashyldy (FOTO)
Ortalyq №71 mektep-gımnazııasynyń ǵımaratynda ornalasqan. Astana qalasynyń ákimshiligi 450 sharshy metrlik aýmaqty bólip, ortalyqta jumys isteıtin mamandardyń aılyq jalaqysyn tóleýdi mindetine aldy. «Dara» qory óz kezeginde bólmelerge jóndeý júrgizip, arnaıy qondyrǵylar, oqý quraldarymen jabdyqtady. Ortalyqta emdeý-dene shynyqtyrý zaly, Montessorı kabıneti, ádistemelik kitaphana bar.
Túzetý ortalyǵy aı saıyn 50-ge tarta múmkindigi shekteýli balalarǵa kómek kórsetedi. Birinshi kezekte zaǵıp balalar qamtylady. Olarǵa tıflopedagog, logoped, defektolog, psıholog, horeograf, shynyqtyrý mamandary memlekettik kvota arqyly tegin qyzmet kórsetedi. Mamandar balalardyń turmystyq-áleýmettik daǵdylaryn qalyptastyrýǵa kómektesip qana qoımaı, olardy balabaqsha, mektepke daıarlaıdy. Ortalyqtyń pedagogtary «Dara» qory «Samuryq» ulttyq ál-aýqat qorynyń qoldaýymen uıymdastyrǵan trenıngterge qatysyp, biliktiligin arttyrdy. Trenıngke jattyqtyrýshy retinde Italııadaǵy psıhologııa jáne psıhomotorıka ınstıtýtynyń dırektory Franko Baskaını, Reseıdiń beldi tıflopedagogy Venera Denıskına shaqyrylǵan.
Mamandardyń aıtýynsha, zaǵıp balalardyń basym kópshiligi ıntelekti durys bolyp týady. Alaıda adam búkil aqparattyń 90 paıyzdan astamyn kóz arqyly qabyldaıtyndyqtan, ýaqyt óte balanyń damýy tejele bastaıdy. Ata-analar arnaıy bilimi bolmaǵandyqtan, óz kúshimen bul máseleni sheshe almaıdy. Sondyqtan da zaǵıp balalar qatarlarymen birdeı damýy úshin bilikti mamandardyń ýaqyt joǵaltpaı, erte aralasýy óte mańyzdy.
Osy ýaqytqa deıin Astanada kórý qabiletinen aırylǵan balalarǵa bilikti kómek kórsetetin mekeme bolǵan joq. 7 jasqa deıingi zaǵıp balalarǵa turǵylyqty jeri boıynsha áleýmettik-medıtsınalyq-pedagogıkalyq kómek uıymdastyrylmaǵan. Jaǵdaı bıyl ǵana ózgere bastady.
Qala turǵyny Gúljahan Imanqulova Sanjar men Saıdýlla esimdi egizderdiń anasy:
«Biz úshin ortalyqtyń ashylýy kópten kútken oqıǵa boldy. Meniń egizderim tórt jasta. Ekeýi de dimkás bolyp týyldy. Saıdýlla múlde kórmeıdi. Ol bıyldan bastap arnaıy balabaqshaǵa baratyn boldy. Sanjar da sal bolyp týyldy, kórý qabileti de óte nashar. Biz aýrýhanalarda jıi emdelemiz. Biraq balanyń aqyl-oıynyń damýy úshin bul jetkiliksiz. Bul ortalyq ashylǵany óte oryndy boldy. Munda mamandar balalardy kóp nársege úıretedi. Birneshe kúnnen beri kelip júrmiz. Sanjarǵa bári de qatty unaıdy. Ortalyqty ashqan azamattarǵa, osynda jumys istep jatqan mamandarǵa alǵysymyzdy bildirgim keledi»,- deıdi Sanjar men Saıdýlla esimdi egizderdiń anasy, qala turǵyny Gúljahan Imanqulova.
Ókinishke oraı, bul ortalyq múmkindigi shekteýli balalardyń barlyǵyn kómekpen qamtı almaıdy. Sondyqtan ata-analar bolashaqta múmkindigi shekteýli balalarǵa arnalǵan medıtsınalyq-áleýmettik kómek júıesi jetile tússe degen tilekte.
Joba «Dara» qorynyń jáne Astana qalalyq bilim basqarmasynyń qatysýymen, demeýshilerdiń qoldaýymen júzege asty.