Astanada UOS ardagerlerine 5 mıllıon teńgeden beriledi

ASTANA. KAZINFORM – Astana ákimdigi Jeńistiń 80 jyldyǵyna oraı Uly Otan soǵysy ardagerlerine beriletin tólem mólsherin 2,5 esege ulǵaıtty.

Osylaısha, astanalyq UOS ardagerleriniń árqaısysyna 5 mıllıon teńgeden beriledi. Qazir elordada 6 ardager turady.

Budan basqa, jeńildikter boıynsha Uly Otan soǵysynyń ardagerlerine teńestirilgender de (Chernobyl AES qatysýshylary men múgedekterinen basqa) tólemaqy alady: UOS kezeńinde qyzmet ótkergen áskerı qyzmetshiler, fashıstik Germanııaǵa qarsy is-qımyldarǵa qatysqandar, Lenıngradta blokada kezeńinde jumys istegen azamattar, kontslagerlerdiń kámeletke tolmaǵan tutqyndary, áskerı qyzmetshiler, jaraqat saldarynan múgedektigi bar adamdar, azamattyq nemese áskerı maqsattaǵy nysandardaǵy radıatsııalyq apattar, ıadrolyq synaqtar saldarynan múgedektigi belgilengen adamdarǵa, múgedektigi ata-anasynyń biriniń radıatsııalyq sáýlelenýinen genetıkalyq jolmen berilgenderge – 45 AEK (176 940 teńge) mólsherinde aqy beriledi.

Ózge memleketter aýmaǵyndaǵy áskerı qımyldardyń ardagerleri (Aýǵanstandaǵy áskerı qımyl ardagerlerinen basqa), tájik-aýǵan sektorynda, Iraktaǵy halyqaralyq bitimgershilik operatsııasynda tapsyrmalardy oryndaǵan áskerı qyzmetshiler, Taýly Qarabaqtaǵy ultaralyq qaqtyǵysty retteýge qatysqandar – 45 AEK (176 940 teńge) alady.

«Ardagerler týraly» QR zańynda kózdelgen ózge de tulǵalarǵa (tyl eńbekkerleri, qaıtys bolǵan áskerı qyzmetshilerdiń otbasylary, qaıtys bolǵan Uly Otan soǵysy ardageriniń jubaıy) – 15 AEK (58 980 teńge) mólsherinde aqy alady.

Aıta keteıik, 2025 jyly Uly Jeńiske 80 jyl tolady.

Qorǵanys mınıstrligi Ekinshi dúnıejúzilik soǵys ardagerlerine Jeńistiń 80 jyldyǵy medalin beredi.