Astanada TúrkPA Bas hatshysy saılandy
ASTANA. KAZINFORM – Túrki memleketterdiń Parlamenttik Assambleıasynyń plenarlyq otyrysynda TúrkPA Bas hatshysy bolyp Ramıl Gasan saılandy.
- TúrkPA bas hatshylyǵynyń reglamenti boıynsha bas hatshy laýazymyna kandıdatýrany Ázerbaıjan tarapy usyný kerek. Assambleıa keńesiniń otyrysynda Ázerbaıjan tarapy osy laýazymǵa usynǵan Ramıl Gasan myrzanyń kandıdatýrasy maquldandy, - dedi plenarlyq otyrys moderatory, Májilis tóraǵasy Erlan Qoshanov.
Daýys berý qorytyndysy boıynsha atalǵan kandıdatýra biraýyzdan qoldaý tapty.
Ramıl Gasan bul qyzmetke 2025 jyldyń 15 qazanynan bastap kirispek.
Sondaı-aq, TúrkPA Bas hatshysynyń orynbasary bolyp Muhammed Alper Haıalı saılandy.
TúrkPA komıssııalarynyń birneshe tóraǵa orynbasary da saılandy. Olar: Bilim, mádenıet, áleýmettik jáne gýmanıtarlyq máseleler jónindegi komıssııa tóraǵasynyń orynbasary - Ázerbaıjan Respýblıkasy Mıllı Medjlısiniń depýtaty Gýnaı Afandıeva, Ekonomıkalyq yntymaqtastyq jónindegi komıssııa tóraǵasynyń orynbasary – Qyrǵyz Respýblıkasy Jogorký Keneshiniń depýtaty Sholpon Sultanbekova.
Aıta keteıik, búgingi plenarlyq otyrys qorytyndysy boıynsha TÚRKPA-ǵa tóraǵalyq Ázerbaıjannan Qazaqstanǵa ótip, Astana deklaratsııasy qabyldanady.
Sondaı-aq, búgin Prezıdent Qasym-Jomart Toqaev TúrkPA-ǵa múshe elder parlamentteriniń spıkerlerimen kezdesti.