Astanada Túrki akademııasynyń 15 jyldyǵy atap ótildi
ASTANA. KAZINFORM — Astanada Halyqaralyq Túrki akademııasynyń 15 jyldyǵyna, sondaı-aq ıÝNESKO bekitken Dúnıejúzi Túrki tilderi kúnine arnalǵan saltanatty is-shara ótti.
Jýyrda ıÝNESKO sheshimimen túrki tilderiniń damýy men saqtalýy maqsatynda 15 jeltoqsan — Halyqaralyq túrki tilderi kúni retinde bekitilgen edi.
Mereıtoılyq jıynda Túrki akademııasynyń sońǵy 15 jyl ishinde jarııalaǵan ǵylymı eńbekteriniń kórmesi uıymdastyrylyp, ekspozıtsııada negizgi birlesken zertteýler, monografııalar men ǵylymı serııalar usynylyp, akademııanyń basty ǵylymı baǵyttary kórsetildi.
Qatysýshylar nazaryna kitap kórmesimen qatar, Akademııanyń qalyptasý jáne damý kezeńderin, halyqaralyq jobalaryn, ǵylymı ekspedıtsııalaryn, arheologııalyq zertteýlerin, sondaı-aq túrki memleketterimen birlese atqarǵan mańyzdy is-sharalary men bastamalaryn qamtyǵan fotogalereıa usynyldy.
Túrki akademııasynyń prezıdenti Shahın Mýstafaev óz sózinde 2009 jyly Nahchyvanda ótken Túrki memleketteri sammıtinde Qazaqstan tarapynan Túrki áleminde ortaq zertteýler júrgizetin uıym qurý usynylǵanyn, nátıjesinde 2010 jyly Astanada Túrki akademııasynyń irgetasy qalanǵanyn eske salyp, mereıtoılyq sharanyń Qazaqstanda atap ótilýiniń erekshe mánge ıe ekendigin atap ótti.
—Akademııa janynda tarıh, arheologııa, etnografııa, ádebıet, til bilimi, termınologııa, óner jáne áleýmettik-ekonomıkalyq baǵyttar boıynsha irgeli jobalar júzege asyrylyp jatyr. Bul zertteýlerdiń nátıjesinde jaryq kórgen ǵylymı eńbekter túrki birligin nyǵaıtýǵa jáne bolashaq urpaqqa baǵdar berýge baǵyttalǵan naqty qadam. Mońǵolııadaǵy Nomǵon, Qazaqstandaǵy Jankent qalashyǵy men Mańǵystaý oblysyndaǵy arheologııalyq qazbalar nátıjesi ǵylymı qaýymdastyqqa keńinen tanystyryldy. Ótken jyly Akademııanyń uıytqy bolýymen Ortaq túrki álipbıi qabyldandy, sondaı-aq Memleket basshylarynyń tapsyrmasymen «Túrki elderiniń tarıhy» akademııalyq monografııasy daıyndalyp jatyr, — dedi akademııa basshysy.
Sonymen birge, Sh. Mustafaev akademııanyń ǵylym men bilim salasyndaǵy ıntegratsııany damytýǵa arnalǵan bastamalaryna toqtalyp, akademııalyq almasý baǵdarlamalary, Túrki ýnıversıtetteri odaǵy — TURKUNIB jáne ORHUN jobasy arqyly ortaq ǵylymı jáne ıntellektýaldy keńistik qalyptasyp jatqanyn atap ótti.
— Aldaǵy ýaqytta akademııanyń ǵylymı dıplomatııany keńeıtý maqsatynda túrki memleketteri arasyndaǵy mádenı jáne akademııalyq yntymaqtastyqty nyǵaıtý jolynda belsendi qyzmet atqara beretinin jetkizdi, — dedi Túrki akademııasynyń basshysy.
Sharanyń ashylý saltanatynda Túrki akademııasynyń prezıdenti, akademık Shahın Mustafaev, QR Ǵylym jáne joǵary bilim mınıstri Saıasat Nurbek, Túrki memleketteri uıymy Aqsaqaldar keńesiniń burynǵy múshesi, professor Ádil Ahmetov jáne ál-Farabı atyndaǵy Qazaq ulttyq ýnıversıtetiniń rektory, professor Janseıit Túımebaev quttyqtaý sóz sóıledi.
Sondaı-aq, merkelik basqosýǵa Parlament depýtattary, Túrki álemi elderiniń elshileri men dıplomatııalyq mıssııa ókilderi, halyqaralyq túrki uıymdarynyń ókilderi, memlekettik organdar men jetekshi ýnıversıtetterdiń, kitaphanalar men mýzeılerdiń basshylary, kórnekti ǵalymdar jáne BAQ jetekshileri qatysty.
Buǵan deıin Túrki akademııasynyń prezıdenti Shahın Mustafaev KAZINFORM agenttigine bergen suhbatynda akademııa qyzmetiniń ózara baılanysy týraly aıtqan edi.