Astanada Temirbek Júrgenov týraly kitaptar tanystyryldy
ASTANA. KAZINFORM — QR Ulttyq akademııalyq kitaphanasynda kórnekti mádenıet qaıratkeri Temirbek Júrgenovtiń 125 jyldyǵy aıasynda tulǵaǵa arnalǵan kitaptardyń tusaýkeseri ótti.
Іs-sharaǵa memleket jáne qoǵam qaıratkerleri, QR Parlamentiniń depýtattary, QR Prezıdenti janyndaǵy Ulttyq quryltaı músheleri, aqyndar men jazýshylar, zııaly qaýym ókilderi jáne oqyrmandar qatysty.
Jazýshy Beıbit Qoıshybaevtyń «Komıssar Júrgenov» kitaby túrik tiline aýdarylsa, jazýshy Almajan Óteǵalıevanyń «Temırbek Jýrgenov: Trıýmf ı Tragedııa» kitaby orys tilinde jaryq kórip, kópshilikke tanystyryldy.
«Komıssar Júrgenov» romanynda memleket qaıratkeriniń ómir joly sıpattalǵan. Al «Temırbek Jýrgenov: Trıýmf ı Tragedııa» monografııalyq eńbeginde Qazaq AKSR-niń Halyq aǵartý komıssary Temirbek Júrgenovtiń memlekettik jáne qoǵamdyq-saıası qyzmeti jan-jaqty ashylǵan.
«Mádenıet jáne aqparat mınıstrligi Temirbek Qaraulynyń murasyn nasıhattaýǵa erekshe kóńil bóledi. Qazaqstan mádenıetin damytýǵa qosqan baǵa jetpes úlesi árdaıym úlgi bop qala beredi», – dedi QR Mádenıet jáne aqparat vıtse-mınıstri Arman Júdebaev.
Aıta keteıik, 2023 jyly TÚRKSOI uıymynyń sheshimimen qazaqtyń memleket jáne qoǵam qaıratkeri Temirbek Júrgenov jyly dep jarııalandy. Halyqaralyq uıym dańqty tulǵanyń qurmetine oraı jyl boıy túrli sharalar uıymdastyrdy.
