Astanada Tekken 8 boıynsha halyqaralyq týrnır ótedi
ASTANA. KAZINFORM – 9–12 shilde aralyǵynda festıval alańynda TEKKEN World Tour 2025 (Dojo Series) resmı kezeńi — «faıtıng» janryndaǵy tanymal kompıýterlik oıyn Tekken 8 boıynsha halyqaralyq týrnır ótedi.
Týrnırge 90-nan astam oıynshy qatysady dep kútilip otyr. Olar álemdik fınalǵa joldama alýǵa qajetti reıtıngtik upaılar men 400 000 teńgelik júlde qor úshin baq synaıdy. Týrnır Ortalyq Azııadaǵy eń iri Tekken fanattar qaýymdastyǵy — Qazaqstan Tekken Fighters (QTF) qoldaýymen uıymdastyrylady.
Týrnır aıasynda Qazaqstannan ǵana emes, kórshiles elderden de kásibı jáne jartylaı kásibı oıynshylardyń qatysýy josparlanýda. Baǵdarlamaǵa jarystyń tikeleı kórsetilimi, úzdik segiz oıynshynyń sheshýshi kezeńi, sondaı-aq pro-geımerlerdiń qatysýymen ótetin Street Fighter 6, Guilty Gear Strive jáne Dragon Ball FighterZ faıtıng baǵyttaryndaǵy sharalar kiredi.
Negizgi jarystardan bólek kórermender kórsetilim oıyndardy, shaǵyn saıystardy tamashalap, kásipqoılarmen tikeleı baılanysqa túse alady. Іs-shara alańynda Tekken 8 oıynyna arnalǵan eksklıýzıvti merch ónimderi usynylady.
Týrnır baǵdarlamasy tórt kúnge sozylady. 9 shildede qatysýshylardyń tirkelýi men Dragon Ball FighterZ oıyny boıynsha arnaıy is-shara ótedi. 10 shildede negizgi jarys bastalyp, Guilty Gear Strive oıyny boıynsha qosymsha týrnır uıymdastyrylady. 11 shildede pleı-off kezeńi ótip, Street Fighter 6 oıynyna arnalǵan is-shara ótkiziledi. Týrnırdiń sheshýshi fınaly 12 shildege josparlanǵan.
Jarysqa qatysý úshin osy silteme arqyly tirkelýge bolady: start.gg/tournament/comic-con-2025-astana. Tirkelý tek Comic Con festıvaline bıleti bar qatysýshylar úshin qoljetimdi. Bıletterdi comicconastana.kz/ticket saıtynan satyp alýǵa bolady.
Comic Con Astana aıasynda ótetin faıtıng-týrnır Otaku Zone arnaıy aımaǵynda oryn alady. Bul keńistik kórermenderge azııa pop-mádenıetiniń san alýan qyryn – anıme, manga, sán, mýzyka jáne dorama álemin usynady. Geımerlik aımaq ınteraktıv pen kýlttik oıyndar arqyly saǵynyshyn oıatyp, bul atmosferany tolyqtyrady.
Qonaqtardy 1 000-nan astam oıyndy qamtıtyn kitaphana, tanymal blogermen birge kooperatıv formatta oınaý múmkindigi, sondaı-aq eki tolyqqandy aımaq kútedi: zamanaýı (PlayStation 5, PK, oıyn rýlderi) jáne klassıkalyq (SEGA, Nintendo, PlayStation 1, PlayStation 2).
Geım-aımaǵynyń aıryqsha núkteleriniń biri — klassıkalyq oıyn qurylǵylarynyń zamanaýı nusqalaryn shyǵaratyn Retro Genesis kompanııasynyń arnaıy stendi. Qatysýshylar eki túrli jelini synap kóre alady: Canonic — túpnusqa kartrıdjdermen tolyq úılesimdilikti qamtamasyz etedi, al Fusion — birneshe konsoldi bir qurylǵyda iske qosýǵa bolatyn zamanaýı múmkindiktermen jabdyqtalǵan.
Comic Con Astana-2025 — festıval tarıhyndaǵy eń aýqymdy is-shara bolmaq. Sonymen qatar bul oqıǵa TMD keńistigindegi pop-mádenıet salasyndaǵy eń iri sharalardyń birine aınalady. 2025 jylǵy festıval bes kúnge sozylady (9–13 shilde aralyǵynda) jáne alǵash ret eki iri alańda ótedi: «Astana-Arena» stadıony men «Barys-Arena» kópsalaly muz saraıy.
2019 jyly negizi qalanǵan sátten bastap, Comic Con Astana shaǵyn jergilikti sharadan kıno, anımatsııa, komıks, vıdeoıyn, kospleı jáne tsıfrlyq óner salalaryndaǵy mamandar men jankúıerlerdi toǵystyratyntolyqqandy halyqaralyq platformaǵa aınaldy.
2025 jylǵy festıvaldiń hedlaıneri — Endı Serkıs, brıtandyq akter, rejısser jáne tsıfrlyq keıipkerlerdi ekranǵa shyǵarý salasyndaǵy jańashyl adam. Ol — qozǵalysty túsirý tehnologııalaryn damytý arqyly kıno ındýstrııasynda tóńkeris jasaǵan tulǵa. Eń tanymal rólderi: Gollým («Saqınalar ámirshisi»), Tsezar («Maımyldar planetasy»), Joǵarǵy kóshbasshy Snoýk («Juldyzdar soǵysy»), Alfred Pennıýort («Betmen», 2022), Kıng-Kong (Pıter Djekson remeıki), Ýlıss Klo (Marvel álemi), Kıno Loı («Andor»). Sonymen qatar Serkıs «Venom 2», «Maýglı» jáne jaqynda jaryq kóretin «Saqınalar ámirshisi: Gollýmǵa ańshylyq» fılmderiniń rejısseri.
Comic Con Astana-da ár jyldary festıvaldiń hedlaıneri retinde álemdik ındýstrııanyń moıyndalǵan juldyzdary qatysty. Olardyń qatarynda Mads Mıkkelsen, Pılý Asbek, Maıkl Rýker, Shon Gann, Persı Haıns Ýaıt jáne basqa da tanymal akterler bar.