Astanada Táýelsizdik kóshesi boıyndaǵy turǵyn úı órtendi

ASTANA. KAZINFORM — Astana qalasy Saraıshyq aýdany Táýelsizdik kóshesinde ornalasqan Sensata Plaza turǵyn úıinde órt shyqty, dep habarlaıdy TJM baspasóz qyzmeti.

Sensata Plaza turǵyn úı kesheniniń 5-12 qabatyndaǵy kabeldi shahtada órt shyqqan. Turǵyndar óz betinshe evakýatsııalandy. Zardap shekkender týraly aqparat túspegen. Oqıǵa ornynda TJM kúshteri men quraldar joǵary dárejede jumys istedi. Qazirgi ýaqytta órt sóndirildi.

— Naqtylanǵan aqparat boıynsha 1-den 12-qabatqa deıingi kabel shahtasynda elektr symdarynyń oqshaýlaýy 36 sharshy metr aýmaqta órtengen, sondaı-aq jertóle bólmesinde 5 sharshy metr aýmaqta jınalǵan jıhaz janǵan. Tótenshe jaǵdaılar departamentiniń kúshimen qutqarý qalpaqtary arqyly baspaldaq marshymen 4 adam qutqaryldy. Zardap shekkender joq. Órttiń sebebi anyqtalyp jatyr, — delingen habarlamada.

Buǵan deıin Astanada 4 maýsym kúni «7 bochek» turǵyn úı kesheniniń syrtqy qaptamasynyń janǵany habarlanǵan edi. Órtengen úıden 100-ge jýyq turǵyn óz betinshe dalaǵa shyqqan, al TJD kúshteri 15 adamdy evakýatsııalaǵan. Keıinnen zardap shekken adamdardyń qonaqúıge ornalastyrylatyny aıtyldy. TJM málimetinshe, órt 250 sharshy metr aýmaqty sharpyǵan. Keshe turǵyndar oqıǵanyń qalaı bolǵanyn aıtyp berdi.