Astanada taǵy bir IT-synyp ashyldy

ASTANA. QazAqparat - Astanadaǵy Kólik jáne kommýnıkatsııalar kolledjinde jańartylǵan IT-synyp ashyldy. Ol jerde optıkalyq-talshyqty kabelderdi tartýǵa úırenýge bolady. Búginde atalǵan kabelder arqyly shalǵaı jatqan aýdandarǵa keń jolaqty ınternet qosylady. Alaıda bir-eki jyldan keıin Qazaqstanda optıkalyq talshyqtyń ornyna spýtnıktik baılanysty qoldaný josparlanyp otyr, dep habarlaıdy QazAqparat tilshisi.

Kolledj oqytýshysy Aqjol Muratulynyń aıtýynsha, jańa synypta teorııany tájirıbe júzinde tekserýge múmkindik bar. Máselen, optıkalyq-talshyqty kabelderdi jan-jaqty zertteýge bolady.

«Optıkalyq-talshyqty kabelderdiń artyqshylyǵy nede? Máselen, mys nemese allıýmınıı symdarda sıgnal toq arqyly beriledi. Al optıkalyq-talshyqty kabelde sıgnal jaryq arqyly taratylady. Osynyń arqasynda sıgnaldy, ıaǵnı aqparatty jyldam jetkizýge bolady. Sońǵy kezderi ınternettiń jaqsy damýy - osy kabelderdiń arqasy. Qazaqtelekom da optıkalyq-talshyqty baılynysty keńinen qoldanyp keledi. Biz bolsaq, osy synypta stýdentterdi optıkalyq talshyqpen jumys isteýge úıretemiz. Budan bólek, stýdentter sıgnal jetkizýdiń san alýan joldaryn is júzinde kóre alady. Fazany ózgertý arqyly sıgnal qalaı jetedi? Jumystyń nátıjesi qandaı? Sonyń bárin kompıýterden kórýge bolady. Osynyń arqasynda jas mamandar óndiriske barǵanda birden jumysqa aralasyp ketedi», - deıdi A.Muratuly.

  Atalǵan bastama «Nur Otan» partııasynyń «Tegin 1000 IT-synyp» jobasy aıasynda qolǵa alynyp otyr. Budan bólek, respýblıka boıynsha IT-ortalyqtar da ashylyp jatyr. Negizgi maqsat - halyqtyń osy saladaǵy saýattylyǵyn arttyrý, kásibı mamandardy daıarlaý. Ortalyqtarda kez kelgen adam qaıta daıarlaý kýrstarynan óte alady. «Osy ýaqytqa deıin respýblıka boıynsha 100-den astam IT-synyp ashyldy. Ondaı synyptarda robot tehnıkasy, 3D modeldeý jáne taǵy basqa aqparattyq tehnologııalarǵa úıretedi. Jyldyń aıaǵyna deıin 250 IT-synypty ashý josparlanǵan. Úsh jyldyń ishinde, kem degende, 1000 synyp ashylady degen jospar bar. Al IT-ortalyqtarda qaıta daıarlaý kýrstarynan ótýge bolady. Biz 15 ortalyqty ashtyq. Jyldyń aıaǵyna deıin taǵy beseýi qurylady», - deıdi «Nur Otan» partııasy Tóraǵasynyń birinshi orynbasary Máýlen Áshimbaev.

Aıta keteıik, «Tsıfrlyq Qazaqstan» baǵdarlamasy aıasynda shalǵaı jatqan aýyldar keń jolaqty ınternetke qosylady. Osynyń arqasynda 2021 jylǵa deıin 1249 eldi mekendi turatyn 2 mln-nan astam adamǵa jyldam ınternet jetedi. QR Aqparat jáne kommýnıkatsııalar mınıstri Dáýren Abaevtyń sózine qaraǵanda, bas kezinde optıkalyq-talshyqty kabelder qoldanylady. Al ekinshi kezeńde spýtnıktik baılanys jáne taǵy basqa jańa tehnologııalarǵa basymdyq beriledi. Sonyń arqasynda keń jolaqty ınternet barlyq eldi mekenderge jetedi degen jospar bar.