Astanada taǵy bir eldi mekenge tabıǵı gaz keldi
ASTANA. KAZINFORM — Elordada eldi mekenderdi josparly gazdandyrý jumysy júrip jatyr. Búgin, ıaǵnı 25 qańtarda «Family Village» turǵyn alabyn tabıǵı gazben jabdyqtaý júıesine qosý aıaqtaldy. Bul týraly elorda ákimdiginiń resmı saıty jazdy.
«QazaqGaz Aimaq» AQ Astana óndiristik fılıalynyń kúshimen turǵyn úı massıviniń taratý jelilerine gaz alǵash ret qosyldy, onda 458 úı kógildir otynǵa qol jetkizdi. Bul halyqtyń ómir súrý sapasyn jáne ekologııalyq jaǵdaıyn jaqsartýǵa baǵyttalǵan qalany gazdandyrýdyń aýqymdy jobasynyń bóligi bolyp sanalady.
Joba aıasynda 8,7 km gaz taratý jelisi salynyp, 277 gaz taratý shkaf pýnkti ornatyldy.
Jylytýǵa ýaqytynda halyqtyń kommýnaldyq qyzmetterge baılanysty shyǵyndary aıtarlyqtaı azaıady. Tabıǵı gaz ekologııalyq qaýipsizdikten bólek, qoljetimdi jáne yńǵaıly otyn bolyp sanalady.
– Astanany gazdandyrý – bul ekologııalyq jaǵdaıdy jaqsartatyn jáne halyqtyń qarjysyn únemdeýge múmkindik beretin strategııalyq joba. Biz naqty nátıjelerdi kórip otyrmyz jáne taǵy bir eldi meken kógildir otynǵa qosylǵanyna qýanyshtymyz, – dep atap ótti qala ákimdiginiń gazdandyrý bóliminiń basshysy Raqymjan Altynbek.
Buǵan deıin ákimdik gazdandyrýdyń eki kezeginiń qurylysyn aıaqtady. Olar – Saryarqa aýdany (Kóktal-1, Kóktal-2 eldi mekenderi, Agroqalashyq jáne qalanyń eski bóligindegi Potanın kóshesiniń aýmaǵy), Almaty aýdany (Jeleznodorojnyı, Promyshlennyı eldi mekenderi, sol sııaqty Ońtústik-Shyǵys eldi mekeniniń oń jáne sol jaq bólikteri, Internatsıonalnyı, sondaı-aq Aqbıdaı, Qazaqaýyl shaǵyn aýdandary), Saraıshyq aýdany (Kúıgenjar jáne Mıchýrıno eldi mekenderi), Esil aýdany (Vella Vılladj kottedj qalashyǵy, Kýrshavel t/k, Femelı taýn, Femelı park t/k) jáne Nura aýdany (Býdapesht, Kosmık Sıtı turǵyn úı keshenderi).
Sondaı-aq, «Turan», «Telman», «Ońtústik-Shyǵys» gaz jylý stantsııalaryna jáne Úrker, Prıgorodnyı, Family Village, Óndiris, Kırpıchnyı eldi mekenderine gaz jetkizý jelileriniń qurylysy aıaqtaldy.
Eske sala keteıik, buǵan deıin Astanada 20 myń jer úıdiń 12 myńy tabıǵı gazǵa kóshirilgenin jazǵan edik.