Astanada taekvondodan halyqaralyq Kazakhstan Open týrnıri bastaldy
ASTANA. KAZINFORM – Búgin elordadaǵy Jaqsylyq Úshkempirov atyndaǵy jekpe-jek saraıynda taekvondodan (WT) Kazakhstan Open 2025 halyqaralyq reıtıngilik týrnıri resmı bastaldy.
Dúnıejúzilik taekvondo federatsııasynyń (World Taekwondo) resmı kúntizbesine engen bul týrnır úsh jas sanatyn qamtıdy - jasóspirimder, jastar jáne eresekter. Jarystyń jalpy júlde qory 15 808 000 teńgeni quraıdy.
Baıraqty dodaǵa Aýǵanstan, Armenııa, Kanada, Frantsııa, Úndistan, Iran, Qazaqstan, Kýveıt, Qyrǵyzstan, Oman, Lıýksembýrg, Marokko, Nepal, Pákistan, Palestına, Qytaı, Saýd Arabııasy, Túrkııa, Týnıs, Birikken Arab Ámirlikteri, AQSh elderi jáne beıtarap mártebedegi (AIN) 750-den astam sportshy qatysady. Olardyń qatarynda Olımpıada chempıondary men álemdik reıtıng kóshbasshylary bar.
Aıta keterligi, Kazakhstan Open 2025 – elimizde sońǵy segiz jylda ótetin alǵashqy G-1 deńgeıli halyqaralyq týrnır. Buǵan deıin mundaı jarystar 2015 jyly Almatyda jáne 2017 jyly Atyraýda ótken bolatyn.
Týrnır jańartylǵan halyqaralyq erejelerge saı, KPNP K-2 júıesi arqyly ótkiziledi. Qazaqstanda alǵash ret sportshylardyń soqqylaryn dál ári ádil tirkeýge arnalǵan KPNP kompanııasy usynǵan jańa elektrondy qolǵaptar qoldanylady.
Jarystyń birinshi kúninde eresekter baq synaýda. Qazaqstan quramasynyń sapynan el namysyn qorǵap jatqan sportshylar: Batyrhan Tóleýǵalı, Samırhon Ababakırov, Azıza Karadjanova, Nodıra Ahmedova, Tamırlan Tleýles, Aıdana Súndetbaı, Javohırhon Islamov, Marııa Sevostıanova, Rıta Bakısheva, Nuraı Qusaınova, Beıbarys Qablan.
Osyǵan deıin habarlaǵanymyzdaı, Qazaqstan taekvondo federatsııasynyń prezıdenti Qudiret Shámıev elimizde 75 myńǵa jýyq adam taekvondo sportymen aınalysatynyn aıtqan bolatyn.