Astanada sý jáne káriz júıesi jańǵyrtylyp jatyr
ASTANA. KAZINFORM – Astana qalasynda tozyǵy jetken káriz júıesi, sý qubyry jelileri az emes. Tipti, ótken ǵasyrdyń 70-80 jyldarynan beri jóndeý kórmegen kommýnaldyq nysandar bar. Saldarynan jıi apatty jaǵdaı tirkelip, turǵyndar zardabyn tartyp jatady.
Osy rette, bul sharýaǵa jaýapty quzyrly organdar ınvestıtsııalyq baǵdarlamalar sheńberinde jańǵyrtý jumystaryn jalǵastyryp jatyr.
Investıtsııalyq baǵdarlamany oryndaýdyń ashyqtyǵyn jarııalaý maqsatynda QR UEM Tabıǵı monopolııalardy retteý komıtetiniń Astana qalasy boıynsha departamenti BAQ, máslıhat depýtattary men Astana qalasy boıynsha qoǵamdyq keńes músheleri úshin «Astana Sý Arnasy» kásipornynyń obektileri boıynsha baspasóz týryn ótkizdi.
Ańǵarǵanymyz, ár ýchaskede jóndeý jumystary qyzý júrgizilip jatyr. «Astana Sý Arnasy» kásiporny bas dırektorynyń paıdalaný jónindegi orynbasary Erjan Sháripovtiń aıtýynsha, jumys kúshi jetkilikti. Tipti, tıisti jumystar aıaqtalǵan soń abattandyrý jumystarymen aınalysatyn brıgada da bar eken. Qajetti materıaldar daıyn.
«Byltyr 2,2 mlrd teńgege ınvestıtsııalyq jobalar júzege asyryldy. Bıyl qarajat kólemi artyp, 2,3 mlrd teńgeni qurap otyr. Qarajatqa sý qubyry jáne káriz jelileriniń 8 shaqyrym bolatyn apattyq ýchaskelerin rekonstrýktsııalaý, 16 tozǵan sorǵy jabdyǵyn aýystyrý jumystary júrgizilip jatyr», - dedi Erjan Sháripov.
Sondaı-aq, natrıı gıpohlorıtin óndirý boıynsha elektrolız qondyrǵysyn (aýyz sýdy zararsyzdandyrý), jelilerdi transheıasyz qaıta tóseý jónindegi qondyrǵylardy, kásiporyn obektilerine arnaıy tehnıkany, sondaı-aq mamandandyrylǵan jabdyqty satyp alǵan.
Investıtsııalyq baǵdarlamalardy júzege asyrý sheńberinde sý jelileriniń tozýyn 41% - dan 39,5% - ǵa deıin tómendetý, sýdyń normatıvtik ysyraptaryn 17% - dan 16,5% - ǵa qysqartý jáne apattyq jaǵdaılardy 2% - ǵa azaıtý kózdelgen.
