Astanada shomylýǵa ruqsat etilgen qansha jaǵajaı bar
ASTANA. KAZINFORM – Astananyń qutqarýshylary Esil ózeniniń jaǵasyn táýlik boıy patrýldeýdi bastady. Qutqarý jabdyqtary men júzý quraldary sondaı-aq qaıyq pen katerleri de tas-túıin daıyn. Mamandar muny shomylý maýsymynyń bastalýymen baılanystyryp otyr. Sebebi sý aıdyndarynda demalatyndardyń sany artyp, qaıǵyly oqıǵalar da bolýy múmkin. Kazinform tilshisi aldyn alý jumystaryn júrgizip jatqan qutqarýshylarmen tildesip keldi.
Astana qalasynyń jedel-qutqarý jasaǵynda 70-ten astam qutqarýshy jyl boıy turǵyndardyń qaýipsizdigin qamtamasyz etedi. Qazir mamandar aldyn alý jumystaryn belsendi júrgizip jatyr, shomylýǵa bolmaıtyn jerlerge eskertý belgisin ornatyp, aqparattyq stendter ilip jatyr.
− Qazir Astana aýmaǵynda shomylýǵa ruqsat etilgen 4 oryn bar. Bul – Ortalyq saıabaq aýmaǵyndaǵy Ortalyq jaǵajaı Kúıgenjar alabyndaǵy «Trı peskarıa», «Armına», «Stolıchnyı dvor» demalys oryndary. Sondaı-aq, ákimdikpen birlesip, Beısekov kóshesindegi kommýnaldyq jaǵajaıdy qaýipsizdik talaptaryna sáıkestendirýdi bastadyq. Qaıǵyly oqıǵaǵa jol bermeý úshin qarapaıym qaýipsizdik erejesin saqtaý kerek. Mas kúıde sýǵa túsýge bolmaıdy, qaýipsizdik sheginen aspaý kerek, eń bastysy — kámeletke tolmaǵan balalardy qaraýsyz qaldyrmaý kerek, −dedi Astana TJD Azamattyq qorǵanys basqarmasynyń bastyǵy Renat Smaǵulov.
Balalardyń qaýipsizdigin prokýrorlar da nazarǵa alǵan. Qadaǵalaýshy organ ókilderi zańnyń saqtalýyn jiti qadaǵalap, ruqsatsyz shomylatyn oryndardy tekseredi. Osy oraıda Astananyń barlyq aýdanyndaǵy prokýratýra basqarmalary zamanaýı drondarmen jabdyqtalǵan.
− Qalanyń barlyq aýdanynda prokýratýra Tótenshe jaǵdaılar departamenti, polıtsııa jáne ákimdik ókilderiniń qatysýymen reıdtik is-sharalar ótkizip jatyr. Sý aıdyndary, jaǵajaılar, sýburqaqtar jáne ózge de yqtımal qaýipti oryndar tekserilip jatyr. Ásirese adam ómiri men densaýlyǵyna qaýip tóndirýi múmkin jerlerge erekshe den qoıylady. Búginde osyndaı reıdterdiń biri Nura aýdany aýmaǵynda ótkizilip jatyr. Munda ornalasqan ashyq sý kózderi men jaǵalaý mańyndaǵy oryndar tekserilip, qaýipsizdik belgiler ornatý, kezekshilik uıymdastyrý jáne qoljetimdilikti shekteý boıynsha sharalar qabyldanyp jatyr, − deıdi elordalyq Nura aýdanynyń Qoǵamdyq múddelerdi qorǵaý bóliminiń prokýrory Raıymbek Ulyqpanov.
Sýdaǵy qaýipsizdik erejelerin buzǵany úshin ákimshilik jaýapkershilik te qarastyrylǵan. Máselen, ótken jylǵy reıd barysynda ruqsat etilmegen jaǵajaılar anyqtalyp, 264 hattama toltyrylyp 1,5 mln teńge aıyppul salynǵan.
Al sýǵa batý oqıǵasyna tap bolsańyz, dereý 112 qyzmetine habarlasqanyńyz abzal, deıdi mamandar.
Aıta keteıik, Óskemende sýǵa batyp bara jatqan 5 jasar balany stýdent qutqaryp qaldy.
Al Ertis ózeninde sýǵa batyp ketken er adamnyń denesi bir aıdan soń tabyldy.