Astanada shahmattan «Senat Open» irikteý kezeńi bastaldy
ASTANA. KAZINFORM – Shahmattan qoǵam belsendileri, jýrnalıster, Parlament jáne máslıhat depýtattary arasynda jarys ótip jatyr.
Astana qalalyq sport basqarmasynan málim etkendeı, búgin shahmattan arasynda Astana qalasy boıynsha «Senat Open» irikteý kezeńi bastaldy. Birinshi márte uıymdastyrylyp jatqan sharaǵa qalamyzdan 106 shahmatshy bas qosyp, 9 týrdyń qorytyndysy boıynsha, 25 oıynshy jartylaı fınalǵa joldama alady.
«Respýblıkalyq deńgeıdegi birinshi márte ótkizilip jatqan «Senat kýbogy» jaqsy bastama dep oılaımyn. Týrnırde Astana qalasy boıynsha VIII shaqyrylym boıynsha 170-ten astam depýtat bar. Búgin sonyń 15-i atalmysh dodaǵa qatysyp jatyr. Odan bólek qalamyzdyń qoǵamdyq keńes, partııa ókilderi, BAQ qyzmetkerleri aqsaqaldar t.b óz kúshterin synaýda. Shahmat — jaı oıyn emes. Ár júriske oılanýdy qajet etetin, strategııaǵa negizdelgen ıntellektýaldy oıyn túri. Búgingi týrnırde shyn myqtylar jeńiske jetsin», — dedi Astana qalasy máslıhatynyń tóraǵasy Erlan Kanalımov ashylý saltanatyndaǵy quttyqtaý sózinde.
Aıta keteıik, Respýblıka boıynsha 17 óńir jáne 3 megapolısten qatysatyn 3 000 qatysýshy arasynan iriktelgen úzdikter tamyz aıynda absolıýtti jeńimpazdy anyqtaıtyn bolady.
Shahmat alańynda tek máslıhat depýtattary ǵana emes, jýrnalıster, qoǵam ókilderi, úkimettik emes sektor ókilderi jınalyp, genderlik, jas jáne t.b sanattar boıynsha bólinbeıdi.
«Shahmatty mektepte qyzmet atqarǵan sátimde 40 jasymda úırendim. Sodan beri arasynda óz qatarlastarymmen oınap kelemin. Degenmen, qarapaıym kezdesýden qaraǵanda, týrnırdiń atmosferasy bólek. Alǵashqy jeńisime erekshe qýandym. Bul da tájirıbe» — dedi, 65 jastaǵy Gúljan atty qatysýshy.
Qazirgi tańda elimizde 200 myńnan astam adam shahmatpen aınalysady. Jeti óńirde atalǵan oıyndy úıretý úshin pılottyq joba qolǵa alynǵan. Bul bastama 42 mektep pen 1000 oqýshyny qamtyp otyr.
