Astanada «Senat Open» týrnıriniń fınaldyq kezeńi ótti
ASTANA. KAZINFORM - Senat Tóraǵasy Máýlen Áshimbaev shahmattan Parlament Senatynyń Ashyq kýbogy – «Senat Open» týrnıriniń fınaldyq kezeńiniń ashylý rásimine qatysty.
«Senat Open» saıysyna 2000-nan astam áýesqoı shahmatshy qatysty. Olardyń qatarynda barlyq deńgeıdegi máslıhat depýtattary, oblystyq jáne qalalyq qoǵamdyq keńestiń músheleri jáne BAQ ókilderi bar.
Máýlen Áshimbaev óz sózinde mundaı týrnırler elimizde, onyń ishinde óńirlerde shahmatty dáriptep, damytýǵa aıtarlyqtaı yqpal etetinin aıtty. Sondaı-aq ol bul baǵytqa Memleket basshysy basa mán berip otyrǵanyn tilge tıek etti.
«Prezıdentimiz Qasym-Jomart Kemeluly Toqaev elimizde shahmatty damytýǵa jáne dáripteýge erekshe kóńil bólip keledi. Búginde bul baǵytta aýqymdy jumys atqarylyp jatyr. Sonyń aıasynda zııatkerlik oıyndy dáripteý maqsatymen «Senat Open» týrnırin ótkizýdi qolǵa aldyq. Saıysqa Parlament pen máslıhat depýtattary, ákimdikter janyndaǵy Qoǵamdyq keńesterdiń músheleri jáne BAQ ókilderi qatysty. Búgin – 5 aıǵa jalǵasqan týrnırdiń sheshýshi kezeńi. Fınaldyq kezeńge oblystyq, sondaı-aq, Astana, Almaty jáne Shymkent máslıhattarynyń tóraǵalary bastaǵan barlyq óńirdiń delegatsııalary qatysyp jatyr», – dedi Palata Spıkeri.
Sonymen qatar Senat Tóraǵasy byltyr elimizde Shahmatty damytýǵa arnalǵan 2027 jylǵa deıingi keshendi jospar qabyldanǵanyn atap ótti. Bul qujat shahmatty balalar men eresekter arasynda keńinen nasıhattaýdy jáne otandyq shahmatshylardyń álemdik arenadaǵy deńgeıin arttyrýdy kózdeıdi. Sondaı-aq qazirgi tańda mektepterde shahmatty úıretý «dene shynyqtyrý» pániniń úlgilik oqý josparyna engizilgenin aıta ketken abzal. Sonyń nátıjesinde júzdegen mektepte shahmat sporty boıynsha fakýltatıvter jumys isteıdi.
Aıta keteıik, «Senat Open» týrnıri Parlament Senatynyń qoldaýymen jáne Qazaqstan shahmat federatsııasynyń (KazChess) uıymdastyrýymen alǵash ret ótkizilip otyr. Іrikteý kezeńi 21 sáýirde bastaldy. Jarys elimizdiń barlyq óńirinde, naqty aıtqanda, 15 oblysta jáne respýblıkalyq mańyzy bar úsh qalada uıymdastyryldy. Ár óńirden úzdik 25 oıynshy soltústik, ońtústik, batys, shyǵys jáne ortalyq bolyp aımaqtyq prıntsıp boıynsha qurylǵan jartylaı fınaldyń birinde oınaý múmkindigine ıe boldy. Solardyń arasynda Astanada ótip jatqan fınaldyq kezeńge 120-dan astam shahmatshy joldama aldy.
«Senat Open» týrnıri máslıhat depýtattaryn, qoǵam qaıratkerlerin jáne BAQ ókilderin ortaq maqsatqa uıystyrǵan shahmat marafonyna aınaldy. Sondaı-aq Qazaqstan shahmat federatsııasy men jergilikti atqarýshy organdar arasynda ózara is-qımyldy nyǵaıtýǵa septigin tıgizdi. Osyndaı yntymaqtastyq shahmatty halyq arasynda keńinen dáripteýdi, mektep baǵdarlamalaryna shahmatty engizýdi jáne zııatker ult qalyptastyrýdy kózdeıtin jobalardy iske asyrýǵa múmkindik beredi. Bul bizdiń ulttyq múdde jolyndaǵy basym baǵyttarymyzdyń biri. Bıyl alǵash ret ótkizilgen Senat kýbogy dástúrli jarysqa aınalady dep senemin», – dedi KazChess prezıdenti Tımýr Týrlov.
Aıta keteıik, fınaldyq kezeńniń jeńimpazdary búgin 9 týrdan turatyn rapıd saıysynyń qorytyndysy boıynsha anyqtalady.
