Astanada sarqyndy sýǵa qatysty tarıf ósýi múmkin
ASTANA. KAZINFORM — Búgin elordada «Astana sý arnasynyń» 2025 jylǵy 1 mamyrdan bastap kórsetiletin qyzmetterge tarıfterdiń ózgerýine qatysty oraı qoǵamdyq tyńdaý ótti.
Ózgerister 2025 jylǵa arnalǵan aǵyndy sýlardy burý jáne tazartý boıynsha retteletin qyzmetke qatysty.
«Energetıkalyq jáne kommýnaldyq sektordy jańǵyrtý» Ulttyq jobasyn (QR Úkimetiniń 25.12.2024 jylǵy № 1102 qaýlysymen bekitilgen), sondaı-aq «Tarıfti ınvestıtsııaǵa aıyrbastaý baǵdarlamasyn iske asyrýǵa baılanysty 2025 jylǵy 1 mamyrdan bastap tarıfterdi ózgertý usynyldy, ıaǵnı ınvestıtsııalyq baǵdarlamanyń qunyn arttyrý eskerilgen.
— 2025 jylǵa arnalǵan ınvestıtsııalyq baǵdarlama jobalaryn iske asyrýdyń bekitilgen quny QQS-syz 1,9 mlrd teńge. Bul qarajat sýmen jabdyqtaý jelilerindegi qurylys-montaj jumystaryna, kárizdik sorǵy stantsııalaryndaǵy tozyǵy jetken qondyrǵylaryn aýystyrýǵa, nysandarǵa arnaýly jabdyqty satyp alýǵa qarastyrylǵan. Degenmen, sýmen jabdyqtaý jáne sý burý jelileriniń tapshylyǵy men jetkiliksiz qýatynyń problemalaryn sheshý úshin kásiporyn 2025 jylǵa arnalǵan ınvestıtsııalyq baǵdarlamanyń qarajatyn ulǵaıtý týraly usynys engizdi. Josparlanǵan qosymsha ınvestıtsııalardyń quny 7,65 mlrd teńge, — dedi «Astana sý arnasy» MKK Bas dırektordyń birinshi orynbasary Erjan Sharipov.
Qarjylandyrý kózi:
— 2,05 mlrd teńge — tarıf esebinen;
— 5,6 mlrd teńge — tarıfterge áser etpeı, respýblıkalyq bıýdjetten.
Onyń aıtýynsha, kásiporyn 1777 sý qubyry jelisine qyzmet kórsetip otyr, sonyń ishinde 434 shaqyrymynda paıdalanýdyń normatıvti merzimi ótip ketken. Jańǵyrtý jáne kúrdeli jóndeýge baılanysty jyl saıynǵy aýystyrý aıasynda orta eseppen 10 shaqyrym qamtylyp otyrǵan. Sondaı-aq, qazirgi ýaqytta kásiporyn teńgeriminde 1238 shaqyrym káriz jelisi bar. Sonyń arasynda 244 shaqyrymynda paıdalanýdyń normatıvti merzimi ótip ketti. Bul rette tozýdyń ortasha deńgeıi 39,7 paıyzdy qurady. Jyl saıyn orta eseppen 2 shaqyrym ýchaske jańartylyp otyrdy.
— Qoldanystaǵy tarıfke toqtalsaq, Astana sýmen jabdyqtaý tarıfiniń deńgeıi boıynsha 20 óńirdiń (17 oblys jáne 3 respýblıkalyq mańyzy bar qala) ishinde 8-shi orynda, al sý burý tarıfiniń deńgeıinde 7-shi orynda. «Sarqyndy sýlardy aǵyzý jáne tazartý» tarıfteriniń ortasha deńgeıin tekshe metrine 134,96 teńgeden 174,29 teńgege deıin ózgertý usynylady. «Halyqqa» arnalǵan tarıf 79,63 teńgeden 102,38 teńgege deıin, jylýmen qamtamasyz etý kásiporyndary boıynsha 240,54 teńgeden 310,63 teńgege deıin (70 teńge), al bıýdjettik uıymdar men zańdy tulǵalar úshin 309,12 teńgeden 399,19 teńgege deıin (90 teńge) ózgeredi, — dedi Erjan Sharipov.
Onyń sózine qaraǵanda, «aýyz sýdy jiberý» jáne «tehnıkalyq sýmen qamtamasyz etý» qyzmetteri boıynsha tarıfter tekshe metrine sáıkesinshe 158,93 teńge jáne 53,43 teńge deńgeıinde ózgerissiz qaldy.
— Qazirgi kezde orta eseppen qyzmet kórsetý aıasyndaǵy esep-qısapqa toqtalsaq, 4 adamnan turatyn otbasy shamamen 18 tekshe metr aýyz sýdy paıdalanady (bir adamǵa 4,5 tekshe metr). Qoldanystaǵy tarıfter boıynsha (01.01.2025 j. bastap qoldanysqa engizilgen, tutyný kólemi boıynsha saralaý tetigi bar) sý jáne káriz úshin tólem 3 246 teńgeni qurap otyr. Sarqyndy sýlardy burý jáne tazartý qyzmetterine usynylǵan ótinim boıynsha tarıfter ózgerse, tólem somasy 3 656 teńgege (ósim 410 teńge) jetýi múmkin, — dedi ol.
Budan buryn habarlanǵandaı, bıyl aqpan aıynda Astanada qoqys pen qaldyqtardy shyǵarý tarıfi ósti.