Astanada prokýratýra bilim berý uıymyndaǵy zań buzýdy anyqtady
ASTANA. KAZINFORM — Astana qalasy prokýratýrasy bilim berý salasy qyzmetkerleriniń quqyqtaryn qorǵady.
Astana qalasynyń «Almaty» aýdany prokýratýrasy bilim berý uıymdarynyń birinde qyzmetkerlerdiń quqyǵy buzylǵanyn anyqtady.
Taldaý barysynda tórt qyzmetkerge uzaq ýaqyt boıy áleýmettik aýdarymdar júrgizilmegeni belgili boldy.
Buǵan olardyń qatelesip jasyna baılanysty zeınetkerler qataryna jatqyzylýy sebep bolǵan.
Alaıda atalǵan qyzmetkerler eńbek sińirgen jyldary úshin zeınetaqy alady jáne qoldanystaǵy zańnamaǵa sáıkes mindetti áleýmettik saqtandyrýǵa jatady.
Nátıjesinde 2023–2025 jyldar aralyǵynda kórsetilgen qyzmetkerler úshin Memlekettik áleýmettik saqtandyrý qoryna aýdarymdar jasalmaǵan.
Prokýratýranyń aralasýynan keıin zań buzý joıyldy: qyzmetkerlerdiń quqyqtary qalpyna keltirilip, 909 936 teńge kóleminde áleýmettik aýdarymdar tólendi, kináli laýazymdy tulǵa tártiptik jaýapkershilikke tartyldy.
Aıta ketelik ShQO-da radıatsııalyq aımaq úshin ústemeaqy tólenbeı kelgen 317 kómekshiniń jalaqysy qaıta qaralǵany týraly jazǵan edik.