Astanada prezıdenttik ınstıtýtynyń qalyptasý tarıhynan syr shertetin kórme ashyldy
Kórmeler Elbasy Kitaphanasy qyzmetkerleriniń «Mýzeı jınaǵy» jobasy aıasyndaǵy ǵylymı-zertteý jumystarynyń nátıjesi jáne respýblıkadaǵy Prezıdent ınstıtýtynyń qalyptasýyna arnalǵan is-sharalar toptamasynyń jalǵasy bolyp otyr. Kórmelerdi Elbasy kitaphanasynyń dırektory, saıası ǵylymdar doktory Ámirhan Rahymjanov quttyqtaý sózimen ashty.
«Osydan 29 jyl buryn, 1990 jyldyń 24 sáýirinde elimizde prezıdenttik ınstıtýt bekitilgen edi. Osy ýaqyttan beri Qazaqstan tarıhynda kóptegen mańyzdy oqıǵalar boldy. Táýelsizdigimizdi alyp, memlekettik nyshandarymyzdy, ulttyq valıýtamyzdy, Konstıtýtsııamyzdy qabyldadyq. Qarýly kúshterimizdi quryp, elimizdi túgel derlik álemdik qaýymdastyq moıyndady. Osy tarıhı oqıǵalardyń arasynda, meniń oıymsha, eń mańyzdysy - Qazaqstandyq prezıdenttik ınstıtýt engizilip, Qazaqstan halqynyń alǵash ret óziniń Prezıdentin tańdaýy boldy. Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevtyń salıqaly saıasaty, kópjyldyq eńbegi arqasynda qazirgi tańda elimiz aıtýly jetistikter men tabystarǵa jetkenine tarıh kýá», - deıdi Ámirhan Rahymjanov.
Іs-sharaǵa L.N. Gýmılev atyndaǵy Eýrazııa ulttyq ýnıversıtetiniń rektory, tarıh ǵylymdarynyń doktory Erlan Sydyqov, osy ýnıversıtettiń professorlyq-oqytýshylyq quramy men dıplomattar, Astany qalasy oqý oryndarynan kelgen tarıhshy-ǵalymdar, sondaı-aq, zergerlik ónerdiń tanymal sheberleri - Estaı Daýbaev, Berik Álibaı qatysty.
Kórmege qoıylǵan eksponattar eki bólimge toptastyrylǵan: birinshisi qurmet belgisi - asataıaqqa, ekinshisi mantııalarǵa arnalyp otyr. Asataıaqtardy sheteldik delegatsııa ókilderi men qazaq eliniń azamattary Elbasynyń el damýyna qosqan orasan zor úlesi úshin qurmet bildire syılaǵany belgili. Árbir asataıaq qazaq halqynyń qoldanbaly-sándik óneriniń erejesine saı jasalǵan. Qalyń kópshilik nazaryna alǵash ret tolyq kólemde usynylyp otyrǵan bul toptamalar Elbasy Nursultan Nazarbaevtyń san alýan memlekettik qyzmetiniń bir qyrymen tanysýǵa múmkindik beredi.
«Asataıaq» qazaq halqynyń tanymynda el ishinde asa zor bedelge ıe, bılik júrgizip otyrǵan qurmetti adamdarǵa berilgen. 2010 jyldyń 24 mamyrynda Túrkııa Prezıdenti Abdýlla Gúl túrki áleminiń rýhanı astanasy, Túrkistan qalasynda bolǵanda túrki ıntegratsııasynyń arhıtektory, aqsaqaly atanǵan Nursultan Nazarbaevqa túrki áleminiń atynan asataıaq syılaǵan bolatyn.
Ekspozıtsııada usynylǵan asataıaqtar zergerlik jáne kórkem ónerdiń teńdessiz týyndylary. Olardyń ústi jartylaı asyl tastarmen kómkerilgen. Aǵash bólikteri kórkem oıylyp, lakpen syrlanǵan. Asataıaqtyń qalyńdaı kelgen ústińgi jaǵynda shar tárizdes nyshan bar. Bul nyshannyń rýhanı bastaý retindegi ózindik qasıeti bar sanalǵan. Asataıaq qazaq halqynyń dástúrlerin eskere bezendirilgen. Máselen, «qoshqar múıiz» halqymyzdyń birligin, molshylyq pen kelisimdi beıneleıdi. 
Ekinshi kollektsııada sheteldik oqý oryndarynyń Elbasyǵa ár jyldary syılaǵan mantııalary usynyldy. Mantııalar álemniń ár qıyryndaǵy oqý oryndarynyń Qazaqstannyń Tuńǵysh Prezıdentiniń joǵary bilimniń ıntegratsııasy aıasyndaǵy asa zor tabystaryn tanýynyń aıǵaǵy. Kelýshiler nazaryna Japonııa, Koreıa, Qytaı, Vetnam, Kanada, Reseı elderi ýnıversıtetteriniń Elbasyǵa bergen mantııalary usynylǵan.
Aıan Bekenuly
