Astanada parkıngte kólik órtenip, 150 turǵyn evakýatsııalandy

ASTANA. QazAqparat – Astanada turǵyn úı kesheniniń parkınginde kólik órtenip, 150 adam evakýatsııalandy, dep habarlaıdy QazAqparat Tótenshe jaǵdaılar mınıstrligine silteme jasap.

9 tamyz kúni saǵat 13.54-te Astana qalasy TJD órt sóndirý bólimsheleri Aqan seri kóshesindegi parkıngte avtokóliktiń janyp jatqandyǵy týraly shaqyrtýǵa shyqqan.

Qutqarýshylar 6 mınýtta jetken. Anyqtalǵandaı, kópqabatty turǵyn úı kesheniniń parkınginde Range Rover markaly avtokólik janyp, qatty tútin paıda bolǵan.

«Jalyndy sóndirý barysynda elordalyq órt sóndirýshiler 5 adamdy qutqardy, onyń ishinde 1 bala, 150 adam evakýatsııalandy, onyń ishinde 30 bala bar.

Qaza bolǵandar men zardap shekkender joq. Órt sóndirýshilerdiń kúshimen saǵat 14.40-ta órt joıyldy. Órt sóndirýge, qutqarýǵa jáne saldaryn joıýǵa Astana qalasy TJD jeke quramynyń 57 adamy men 14 tehnıkasy, sondaı-aq Apattar medıtsınasy ortalyǵynyń 3 adamy men 1 tehnıkasy jáne 103 qyzmetinen 3 adam men tehnıka jumyldyryldy.

Qazirgi ýaqytta arnaıy mashınanyń kómegimen jeldetilmeıtin parkıngten tútin shyǵarý jumystary júrgizilip jatyr», - delingen málimette.