Astanada ótetin UQShU sammıtine 5 eldiń basshysy qatysady

ASTANA. KAZINFORM — Táýelsiz Memleketter Dostastyǵy (TMD) Bas Hatshysy Sergeı Lebedev pen Shanhaı Yntymaqtastyq Uıymynyń (ShYU) Bas hatshysy Chjan Mın Astanada 28 qarashada ótetin Ujymdyq Qaýipsizdik týraly shart uıymynyń sammıtine qatysýǵa shaqyrtý aldy. Bul týraly QR Syrtqy ister mınıstrliginiń baspasóz qyzmetinen málimdedi, dep habarlaıdy TASS aqparat agenttigi. 

Onyń málimetinshe, sharaǵa Reseı prezıdenti Vladımır Pýtın, Qazaqstan prezıdenti Qasym-Jomart Toqaev, Belarýs prezıdenti Aleksandr Lýkashenko, Qyrǵyzstan prezıdenti Sadyr Japarov, Tájikstan prezıdenti Emomalı Rahmon jáne UQShU bas hatshysy Imanǵalı Tasmaǵanbetov qatysady. 

Habarlamada Armenııa ókilderiniń esimderi atalǵan joq. Buǵan deıin Armenııa SІM baspasóz hatshysy Anı Badalıan Armenpress agenttigine eldiń Syrtqy ister mınıstri Ararat Mırzoıan Syrtqy ister mınıstrleri keńesi men Qorǵanys mınıstrleri keńesiniń, UQShU-ǵa múshe elderdiń Qaýipsizdik keńesteri hatshylary komıtetiniń otyrysyna qatyspaıtynyn málimdegen bolatyn.

«Sessııa barysynda halyqaralyq jáne óńirlik qaýipsizdiktiń ózekti máselelerin, sonymen qatar aǵymdaǵy jyly Qazaqstan Respýblıkasynyń UQShU-ǵa tóraǵalyq etý kezeńinde Qazaqstan Respýblıkasynyń basymdyqtaryn oryndaý jónindegi sharalardy iske asyrý barysyn talqylaý josparlanyp otyr», — dep atap ótti Qazaqstan SІM baspasóz qyzmeti.

Aıta keteıik, Prezıdenttiń shaqyrýymen Vladımır Pýtın Qazaqstanǵa memlekettik saparmen keletini habarlandy.

Sonymen qatar, Astanadaǵy sammıtke baılanysty 27-28 qarashada elordanyń keıbir JOO stýdentteri qashyqtan oqıtyny belgili boldy.

                                                                                                                                                                                                                                                   Ádııa Qapanova