Astanada ótetin 5-shi Dúnıejúzilik kóshpendiler oıyndarynyń bas demeýshisi belgili boldy
ASTANA. KAZINFORM – 5-shi Dúnıejúzilik kóshpendiler oıyndaryn daıyndaý jáne ótkizý jónindegi Dırektsııasy «Alageum Electric» Kompanııalar tobymen ekijaqty memorandýmǵa qol qoıdy.
Memorandým negizinde «Alageum Electric» 5-shi Dúnıejúzilik kóshpendiler oıyndarynyń resmı bas demeýshisi bolyp tanyldy.
Sharaǵa 5-shi Dúnıejúzilik kóshpendiler oıyndaryn daıyndaý jáne ótkizý jónindegi Dırektsııa basshysy Naıl Nurov pen «Alageum Electric» KT Dırektorlar keńesiniń Tóraǵasy Erkebulan Іlııasov qatysty.
«Otandyq alpaýyt kompanııanyń jyldyń eń mańyzdy oqıǵasy – 5-shi Dúnıejúzilik kóshpendiler oıyndaryna qyzyǵýshylyq tanytýy otandyq sportqa, onyń ishinde ulttyq sportqa degen joǵary qurmetti kórsetedi. Biz Alageum Electric kompanııasynyń 5-shi Dúnıejúzilik kóshpendiler oıyndarynyń bir bóligi bolǵanyna qýanyshtymyz», - dedi dırektsııa basshysy Naıl Nurov.
Ulttyq sport túrlerin qoldaý jáne olardy odan ári damytý jónindegi jumysty júıeleý maqsatynda 2024 jyly «Ulttyq sport túrlerin qoldaý qory» Qoǵamdyq qory quryldy.
«Ulttyq sport qorynyń» basty maqsaty: ulttyq sport túrlerin damytý, sportshylar men jattyqtyrýshylardy qoldaý, ulttyq dástúr men mádenıetti nasıhattaý ári saqtaý. Odan bólek ulttyq sport túrlerinen ótetin jarystardyń sapaly ótýine, sportshylarǵa qarjylyq jáne materıaldyq kómek kórsetýge, jattyqtyrýshylar men tóreshilerdiń biliktiligin arttyrýǵa jáne damý baǵdarlamalaryn iske asyrýǵa yqpal jasap, ulttyq sport túrlerin zertteý jáne damytý boıynsha ǵylymı-zertteý jumystaryn atqarý qordyń tikeleı qyzmeti bolmaq.
«Bizdiń kompanııa árqashan elimizdiń mádenı jáne sporttyq dástúrin qoldaýǵa jáne damytýǵa umtylady. Dúnıejúzilik kóshpendiler oıyndarynyń bas demeýshisi mártebesi - bul bizdiń aǵymdaǵy jumysymyzdyń jalǵasy dep sanaýǵa bolady. Biz halyqaralyq arenada dástúrli sport túrlerin nasıhattaýǵa óz úlesimizdi qosa alýymyzdy maqtan tutamyz», - dedi «Alageum Electric» KT Dırektorlar keńesiniń Tóraǵasy Erkebulan Іlııasov.
«Alageum Electric» elektrotehnıka kompanııasy Qazaqstan Respýblıkasy Týrızm jáne Sport mınıstri Ermek Marjyqpaevtyń tikeleı muryndyq bolýymen 5-shi Dúnıejúzilik Kóshpendiler oıyndaryn qoldaýǵa nıet bildirdi. Bul mańyzdy qadam Kompanııanyń ulttyq sport túrlerin qoldaý jáne damytý jolyndaǵy adaldyǵyn, sonymen qatar áleýmettik jaýapkershiligin, tamyryna jáne halyqtyń tarıhı murasyna degen qurmetin kórsetedi.
Esterińizge sala keteıik, etnıkalyq sport túrlerinen ótkiziletin halyqaralyq sport jarystary – 5-shi Dúnıejúzilik kóshpendiler oıyndary 8-13 qyrkúıek aralyǵynda Astana qalasynda ótedi. Іs-sharada 89 elden 2000-nan astam qatysýshy bolady dep josparlanýda. 5-shi Dúnıejúzilik kóshpendiler oıyndarynyń Bas demeýshisi - ALAGEUM ELECTRIC, Oıyndardyń Bas seriktesi - Halyk Bank. Astanada ótetin Dúnıejúzilik kóshpendiler oıyndarynda barlyǵy 21 sport túrinen 97 medal jıyntyǵy sarapqa salynady.
