Astanada óshken jaryq 7 aýrýhananyń jumysyna áser etken

Keshegi Astananyń energetıka júıesindegi aqaý medıtsınalyq mekemelerdiń jumysyn qıyndatqan, dep habarlaıdy Kazinform agenttigi.

Astana qalalyq densaýlyq saqtaý basqarmasynyń málimeti boıynsha, №1 kópsalaly aýrýhana qyzmetkerleri elektr qýatynyń ajyratylýyna baılanysty naýqasty jansaqtaý bólimine lıftisiz, baspaldaqpen kótergen.

«Elektr qýaty óship qalǵan kezde naýqas áıeldi durys baqylaý úshin jansaqtaý bólimine baspaldaqpen kóterip shyǵardyq. Óıtkeni lıftiler jumys istemeı qalǵan edi», - deıdi basqarmanyń baspasóz qyzmetindegiler.

Qazir atalǵan naýqastyń jaǵdaıy birqalypty.

Vedomstvonyń aqparaty boıynsha, elektr jaryǵynyń óshýi qalalyq medıtsınalyq mekemeniń jumysyna áser etken.

Abyroı bolǵanda ol mekemelerdiń bári generatorǵa jalǵanyp, tok úzdiksiz berilgen.

«Qala aýrýhanalarynyń bári generatorǵa jalǵanǵan. Jaryq óshkende ózdiginen sol generator qosylady. Almaty jáne Baıqońyr aýdandaryndaǵy aýrýhanalar medıtsınalyq mekemelerdi generator kómegimen ishinara elektrge jalǵady. ıAǵnı, elektr qýaty jansaqtaý jáne qarqyndy terapııa bólimderine, ota jasaıtyn bólimshelerge basymdyqpen berildi. Qalǵan bólimsheler men palatalarda jaryq bolǵan joq. Óıtkeni generatorlardy birinshi kezekte jansaqtaý jáne ota jasaıtyn bólimderge berý qajet boldy. Apat saldary joıylǵannan keıin aýrýhanalardyń búkil blogyna jaryq berildi. Elektr qýaty ajyratylǵan kezeńde aýrýhanalarda eshqandaı shuǵyl ota jasalǵan joq», - delingen basqarmanyń málimetinde.

Aıta keteıik, keshe túnde Astananyń birneshe aýdanynda jaryq sónip, saldarynan kommýnaldyq qyzmette aqaý paıda bolǵan edi.