Astanada órtke baılanysty 26 qylmystyq is qaralyp jatyr

Elordada órt faktileri boıynsha, 26 qylmystyq is bar. Onyń ishinde 2 fakt boıynsha órttiń týyndaýyna kináli adamdar sottaldy. Bul týraly qalalyq tótenshe jaǵdaılar departamenti basshysynyń birinshi orynbasary Damır Ermaǵambetov málim etti, dep habarlaıdy QazAqparat tilshisi. 

«Osy ýaqytqa deıin órtti sóndirý jáne avarııalyq-qutqarý jumystary boıynsha 4 242 jedel shaqyrtý boldy. 634 adam qutqaryldy jáne evakýatsııalandy sol sııaqty 87 zardap shegýshige dárigerge deıingi kómek kórsetildi. Órt kezinde 30 adam jaraqat alyp, 7 adam qaza tapty. Búginde bizdiń departamenttiń esebine 24 791 obekt alyndy, onyń ishinde táýekeli joǵary dárejege jatatyn 3 573 obekt bar», - Damır Ermaǵambetov máslıhat otyrysynda.

Onyń málimetinshe osy kúnge deıin órt qaýipsizdigi boıynsha 591 tekserý júrgizildi. Onyń barysynda 4 533 órt qaýipsizdigi erejelerin buzý faktisi anyqtalyp, 223 azamat ákimshilik jaýapkershilikke tartylǵan.

«Órtke baılanysty qylmystyq faktiler boıynsha departamentte qylmystyq qýdalaý organdarynyń óndirisinde 26 qylmystyq is bar. Onyń ishinde 2 fakt boıynsha órttiń týyndaýyna kináli adamdar sottaldy. Jalpy, bizdiń departament júrgizip jatqan aldyn alý jumystarynyń nátıjesinde elordada órttiń sany 19%-ǵa, onyń ishinde turǵyn úı sektorynda 35% - ǵa tómendedi. Sondaı-aq órt kezinde qaza tapqan adamdardyń sany 41,7%-ǵa azaıdy», - deıdi spıker.