Astanada «Ortalyq Azııa – Qytaı» medıaforýmy bastaldy

ASTANA. KAZINFORM — Elordada Ortalyq Azııa elderi men Qytaı eli medıa salasy mamandarynyń qatysýymen forým ótip jatyr. 

Medıaforým Prezıdent Qasym-Jomart Toqaevtyń quttyqtaý sózimen ashyldy. Quttyqtaý sózin QR Prezıdentiniń ishki saıasat máseleleri jáne kommýnıkatsııalar jónindegi kómekshisi Arman Qyryqbaev oqyp berdi.

— Qurmetti dostar, sizderdi Qytaı men Ortalyq Azııanyń yqpaldastyǵyn arttyrýǵa arnalǵan forýmnyń ashylýymen quttyqtaımyn. Bul - bizdiń elimizdiń medıa salasyndaǵy kelisim men senimdi arqaý etken, seriktestikti bekemdeı túsetin bas qosý.

Búginde jer júzinde aýqymdy ózgerister bolyp jatyr, túrli mádenıetter men qoǵam arasyndaǵy altyn kópir sanalatyn jýrnalısterdiń róli burynǵydan da artyp keledi. Saýatty ári baıypty aqparattyq saıasat, yntymaǵymyzdy kúsheıtip, ornyqty damýymyzǵa septigin tıgizedi. Qazirgi zamanda medıa salasynda beıbitshilikti, ózara qoldaý men tatýlyqty dáripteıtin asa mańyzdy quralǵa aınaldy. Osy oraıda Qytaı Halyq Respýblıkasynyń tóraǵasy Sı Tszınpın myrzanyń «Bir beldeý, bir jol» bastamasynyń máni zor. Biregeı joba jahandyq yntymaqtastyq tujyrymdamasy retinde álem qaýymdastyǵynyń joǵary baǵasyna ıe bolyp otyr.

Qazaqstan Qytaı Halyq Respýblıkasymen dostyq qatynasty damytýǵa aıryqsha mán beredi. Tıimdi dıalog qurýǵa umtylǵan elderimizdiń múddesi bir, maqsaty ortaq. Halyqtardyń bir-birin jaqyn tanyp bilýi jáne jahandyq syn-qaterlerdiń sheshimin birlesip izdeý óte mańyzdy. Buǵan jaýapkershiligi mol medıa salasy ókilderi zor úles qosa alady. Mundaı alqaly jıyndar Eýrazııa keńistiginde turaqtylyq, ashyqtyq jáne jasampazdyq qaǵıdattaryn ornyqtyra túsýge yqpal etedi. Forýmda osy aımaqtaǵy barlyq eldiń ıgiligine qyzmet etetin tyń ıdeıalar men parasatty pikirler aıtylady dep senemin. Barshańyzǵa baq-bereke, mol tabys tileımin, — delingen Prezıdent quttyqtaýynda.

Jibek joly «BAQ-pen birge: Qytaı men Ortalyq Azııanyń tyǵyz taǵdyr qaýymdastyǵyn qurý» taqyryby tańdaldy.

Medıaforýmdy uıymdastyrýshy «Jenmın jıbao» gazeti jáne Qazaqstan Respýblıkasynyń Prezıdenti Teleradıokesheni. Atalǵan is-sharaǵa shamamen 140 sala mamany qatysyp jatyr.

Jaqynda Astanada «Qytaı — Ortalyq Azııa» sammıti qarsańynda yntymaqtastyq perspektıvalary talqylandy.