Astanada órt qaýipsizdigin saqtaý jóninde túsindirme jumystary júrgizildi
Elordada órt qaýipsizdigi erejelerin saqtaý boıynsha jedel aldyn alý is-sharasy ótti, dep habarlaıdy Kazinform qala ákimdiginiń resmı saıtyna silteme jasap.
Qalalyq tótenshe jaǵdaılar departamenti men polıtsııa departamenti birlesip ótkizgen bul arnaýly tekserý jumysyna «Amanat» partııasynyń «Jastar rýhy» qanatynyń eriktileri de qatysty. Olar 4 topqa bólinip Almaty aýdanyndaǵy qonaqúılerdiń, jataqhanalardyń órt qaýipsizdigin, tosyn jaǵdaılarǵa tótep berý daıyndyǵyn tekserdi.
Tekserý barysynda órt qaýipsizdigine nemquraıdy qarǵan kásipkerlerge eskertý jasalyp, túsindirý júrgizildi. Órtten saqtaný jaıly jadynamalar taratylyp, tosyn jaǵdaılardyń aldyn alý sharalary túsindirildi.
Astanada órt qaýipsizdigin saqtaý boıynsha túsindirý jumysy udaıy júrgizip keledi. Bıyl tamyz aıynan beri órt qaýipsizidigin saqtaý qyzmetkerleri 31 myńnan asatam turyǵyn úıdi aralap, tilsiz jaýdyń aldyn alýǵa qatysty túsindirme jumystaryn ótkizgen.
«Bıyl jyl basynan beri Astanada 549 órt ketý oqıǵasy tirkeldi. Ótken jyldarmen salystyrǵanda órt oqıǵalary azaıǵany baıqalady. Degenmen turǵyndar da, kásipkerler de barlyq qaýipsizdik erejelerin saqtaýy kerek.
Adamdardyń ómiri men densaýlyǵyna eshteńe qaýip tóndirmeýi kerek. Bıyl bas qalada turǵyn úı aýmaqtarynda 223 ret órt oqıǵasy bolyp, 12 adam qaza taýyp, 27 adam jaralanǵan, 38 adam ys-tútekten zardap shekken. Sondyqtan jataqhanalar, shaǵyn qonaqúıler bolsyn, eń aldymen, órt qaýipsizdigin saqtaýǵa erekshe kóńil bólýi kerek. Órt bola qalǵan jaǵdaıda belgi beretin dabyl júıesiniń bolýy aıyryqsha mańyzdy», – dedi Astana qalasy tótenshe jaǵdaılar departamenti memlekettik órt baqylaý basqarmasy basshysynyń mindetin atqarýshy Madııar Myrzakeldıev.
Reıd barysynda Almaty aýdanyndaǵy 20 shaǵyn qonaqúıge tekserý júrgizildi.
Tótenshe jaǵdaılar departamentiniń deregi boıynsha, búginde Astana qalasy boıynsha resmı túrde 229 qonaqúı men 80 hostel jumys isteıdi.
Qalalyq tótenshe jaǵdaılar departamenti men polıtsııa departamenti aldaǵy ýaqytta osy oryndarda órt qaýipsizdigin saqtaý boıynsha túsindirý júrgizedi. Aýla aralaý kezinde polıtsııa ókilderi men tótenshe jaǵdaı qyzmetiniń mamandary jataqhana jáne basqa da kommertsııalyq qyzmet úshin paıdalanylatyn turǵyn úılerge erekshe nazar aýdardy.