Astanada ofıtserler baly ótti

ASTANA. QazAqparat – Ulttyq qorǵanys ýnıversıtetinde Respýblıka kúnine oraı ofıtserler baly ótti, dep habarlaıdy QazAqparat.

QR Qorǵanys mınıstrliginiń baspasóz qyzmetinen málim etkendeı, ofıtserler baly – urpaqtan-urpaqqa jalǵasyp kele jatqan jaqsy dástúr. Áskerı qyzmetshiler munda jańa qyrynan kórinedi. Olar sypaıylyq, talǵampazdyq pen bekzattyq ádepterin pash etedi.

Sharaǵa ofıtserler óz jubaılarymen qatysty. Qazylar alqasyna Qorǵanys mınıstriniń orynbasary general-leıtenant Sultan Kamaletdınov tóraǵalyq etti.

«Bul sharany Ulttyq mereke – Respýblıka kúnine arnadyq. Áskerıler arasyndaǵy ofıtserler baly ejelden bekzattyqtyń, hanymdarǵa degen kózqarastyń, súıispenshilik pen adaldyqtyń sımvoly bolyp tabylady», – dedi Qorǵanys mınıstriniń orynbasary.

Nátıjesinde Áskerı-gýmanıtarııa ǵylymdary fakýltetiniń músheleri úzdik dep tanyldy. Jekelegen juptar «Kórkemdik», «Úılesimdilik», «Biregeılik» jáne «Gratsııa» atalymdary boıynsha marapattaldy.