Astanada neırohırýrgııanyń jahandyq kóshbasshylary bas qosty
ASTANA. KAZINFORM — 27-28 maýsym kúnderi elordada Ýolter Dendı atyndaǵy neırohırýrgııalyq assotsıatsııasynyń (Walter E. Dandy Neurosurgical Society) X Dúnıejúzilik kongresi ótkizip jatyr, dep habarlaıdy Ulttyq neırohırýrgııa ortalyǵynyń baspasóz qyzmeti.
Mereıtoılyq forýmǵa AQSh, Eýropa, Azııa, TMD jáne Taıaý Shyǵystaǵy jetekshi neırohırýrgtardy qosa alǵanda, 20 elden 400-den astam delegat keldi.
Kongress — neırohırýrgııa salasynda halyqaralyq deńgeıde tanymal kóshbasshy, Ýolter Dendı qaýymdastyǵynyń negizin qalaýshy jáne halyqaralyq klınıkalyq standarttarǵa aınalǵan kóptegen ǵylymı jumystyń avtory, Assotsıatsııanyń Jahandyq Prezıdenti — professor Salım Abdýlraýftyń (Salim Abdulrauf) jetekshiligimen ótkizilip jatyr.
Walter E. Dandy assotsıatsııasy 2011 jyly AQSh-ta zamanaýı neırohırýrgııanyń negizin qalaýshylardyń biri — doktor Ýolter Edvard Dendıdiń qurmetine quryldy. Uıym qurylǵan sátten bastap búkil álemde ozyq tájirıbeni nasıhattaýǵa, ǵylymı bilimmen almasýǵa jáne neırohırýrgııalyq kómek deńgeıin arttyrýǵa baǵyttalǵan. Qazaqstanda X Kongress ótkizý — otandyq neırohırýrgııanyń jetistikterin moıyndaý jáne joǵary halyqaralyq senimniń aıǵaǵy.
Іs-sharanyń eki kúndik baǵdarlamasynda 40-tan astam ǵylymı baıandama, dóńgelek ústel, pikirtalastar men sheber-klastar bar. Eń ózekti máseleler talqylanýda: ınnovatsııalyq neırohırýrgııalyq tásilder, neırohırýrgııada joǵary tehnologııalardy qoldaný, kúrdeli tamyrly jáne onkologııalyq patologııalardy emdeý, sondaı-aq fýnktsıonaldyq jáne balalar neırohırýrgııasyndaǵy jańa baǵyttar.
— Astanada Kongress ótkizý — álemdik arenada qazaqstandyq neırohırýrgııany qurmetteý men moıyndaýdyń belgisi. Biz elimizde álemniń úzdik mamandaryn qushaq jaıa qarsy alýǵa árqashanda daıynbyz. Astana — jahandyq dıalog, bilim almasý jáne jańa medıtsınalyq ıdeıalar ortalyǵyna aınalýda. Jyl saıyn bizdiń Ortalyqta 5 myńnan astam operatsııa jasalady. Ortalyq sonymen qatar ǵylymı qyzmetpen belsendi aınalysady. Qazirgi ýaqytta Ulttyq neırohırýrgııa ortalyǵy ázirlegen ádisti: omyrtqa denelerin aýystyrýǵa arnalǵan derbestendirilgen 3D tehnologııalyq ımplanttaryn kommertsııalandyrý boıynsha jumystar júrgizilýde. Bul ádistiń praktıkalyq qyzmetke ıntegratsııasy — ádistiń engizý aýqymynyń ulǵaıýy men masshtabtaý perspektıvalaryn ashady. Sondaı-aq, bizdiń Ortalyqta Ortalyq Azııadaǵy jalǵyz radıohırýrgııalyq keshen — «Gamma-pyshaq» apparaty jumys isteıdi. Búgingi tańda onyń kómegimen 2000-nan astam patsıent emdeldi. Ortalyq Azııa elderinde «Gamma-pyshaq» apparatyn paıdalaný aýqymyn keńeıtý maqsatynda úkimetaralyq kelisim jasasý boıynsha jumystar júrgizilip jatyr, — dep atap ótti «Ulttyq neırohırýrgııa ortalyǵy» AQ Basqarma tóraǵasy, Ýolter Dendı atyndaǵy neırohırýrgııalyq assotsıatsııanyń X Dúnıejúzilik kongresiniń Prezıdenti, professor Serik Aqsholaqov.
Kongrestiń saltanatty ashylýyna Walter E.Dandy neırohırýrgııalyq assotsıatsııasynyń Dúnıejúzilik kongresiniń Jahandyq Prezıdenti — Saleem Abdulrauf (AQSh), QR Premer-mınıstriniń orynbasary — E.B. Kósherbaev, QR Densaýlyq saqtaý mınıstri A.Sh. Álnazarova, QR Prezıdenti janyndaǵy Ulttyq Ǵylym akademııasynyń Prezıdenti A.K. Kúrishbaev, QR Parlamenti Májilisiniń Áleýmettik-mádenı damý komıtetiniń tóraǵasy A.Q. Aımaǵambetov jáne Ǵylymı-zertteý ınstıtýttary men Medıtsınalyq ortalyqtardyń birinshi basshylary qatysty.
Saltanatty shara Memleket basshysy Qasym-Jomart Toqaevtyń arnaıy joldanǵan quttyqtaýymen ashyldy. Prezıdenttiń quttyqtaý hatyn QR Premer-Mınıstriniń orynbasary Ermek Kósherbaev oqyp berdi.
— Qadirli qaýym! Barshańyzdy Ýolter E. Dendı atyndaǵy neırohırýrgter qaýymdastyǵynyń onynshy dúnıejúzilik kongressiniń ashylýymen quttyqtaımyn! Bul — neırohırýrgııa salasyndaǵy álemniń eń úzdik mamandary bas qosatyn mańyzdy jıyn. Qazaqstan medıtsınanyń ozyq tehnologııalarǵa negizdelgen osy baǵytyn damytýǵa basa mán beredi. Elimizdegi Ulttyq neırohırýrgııa ortalyǵy ınnovatsııalyq emdeý tásilderin qoldaný arqyly myńdaǵan adamnyń ómirge oralýyna yqpal etip otyr. Munda radıohırýrgııanyń «altyn standarty» sanalatyn, Ortalyq Azııadaǵy jalǵyz Gamma-pyshaq júıesi sátti paıdalanylyp keledi. Sonymen qatar, ortalyqta júkti áıelder men jańa týǵan nárestelerge de joǵary kúrdelilik deńgeıindegi otalar jasalýda. Ǵylym men tehnologııanyń sońǵy jetistikteri, sondaı-aq jasandy ıntellektiniń áleýeti neırohırýrgııa salasynyń kókjıegin keńeıte túsetini sózsiz. Bul baǵyttaǵy turaqty damý úshin salaaralyq ózara is-qımyl men jahandyq medıtsınalyq qaýymdastyqtyń yntymaqtastyǵyn nyǵaıtý asa mańyzdy. Alqaly jıyn kásibı mamandardyń ǵylymı ıdeıalar men emdeý tájirıbesin almasýyna, sondaı-aq halyqaralyq baılanystardy jandandyrýǵa tyń serpin beredi dep senemin. Kongress jumysyna tabys tileımin! — delingen hatta.
Aıta keteıik, búgingi tańda Ulttyq neırohırýrgııa ortalyǵynda jyl saıyn júıke júıesiniń eń kúrdeli patologııasy bar patsıentterge 5000-ǵa jýyq operatsııa jasalady.
Budan buryn Ulttyq neırohırýrgııa ortalyǵynyń dárigerleri áıeldiń mıyndaǵy almanyń kólemindeı isikti alyp tastaǵanyn jazǵan edik.