Astanada Musylman aqsaqaldar keńesiniń ókildigi ashyldy
Senat tóraǵasy – Álemdik jáne dástúrli dinder kóshbasshylary sezi Hatshylyǵynyń basshysy Máýlen Áshimbaev Astanada Musylman aqsaqaldar keńesi ókildiginiń ashylý rásimine qatysty. Kazinform bul týraly Senattyń baspasóz qyzmetine silteme jasap habarlaıdy.
Atalǵan is-shara búgin Álemdik jáne dástúrli dinder kóshbasshylary sezi Hatshylyǵynyń HHІ otyrysy aıasynda ótti.
Saltanatty rásimde Máýlen Áshimbaev uıymnyń Ortalyq Azııadaǵy ókildigin ashý týraly usynysty Álemdik jáne dástúrli dinder kóshbasshylarynyń VII sezinde Ál-Azhardyń joǵarǵy ımamy, sheıh Ahmed át-Taıeb jasaǵanyn aıtty. Qazaqstan Prezıdenti Qasym-Jomart Toqaev bul bastamaǵa qoldaý bildirdi.
«Musylman aqsaqaldar keńesi barlyq dinderdiń yntymaǵyn nyǵaıtýdy kózdeıdi. Osyndaı bedeldi uıymnyń aımaqtaǵy ókildiginiń Qazaqstanda ashylýy biz úshin úlken mártebe. Keńes dáripteıtin toleranttylyq, beıbit qatar ómir súrý, ózara qamqor bolý sııaqty qundylyqtar Qazaqstan úshin de mańyzdy basymdyqqa ıe. Aldaǵy ýaqytta sezd Hatshylyǵy konfessııaaralyq jáne órkenıetaralyq dıalogty halyqaralyq deńgeıde damytý baǵytynda keńespen birge belsendi jumys isteıdi», – degen Máýlen Áshimbaev jańadan ashylǵan ókildiktiń jumysyna sáttilik tiledi.
Aıta keteıik, Musylman aqsaqaldar keńesi – beıbitshilik pen jahandyq dinaralyq dıalogty nyǵaıtý maqsatymen qurylǵan táýelsiz halyqaralyq uıym. Keńestiń fılıaldary buǵan deıin Shveıtsarııa, Mysyr jáne Marokko elderinde ashylǵan.
Sonymen qatar búgin Senat spıkeri Máýlen Áshimbaev «Somaiya Vidyavihar» ýnıversıtetiniń Kantsleri, ındýızm delegatsııasynyń basshysy Samır Shantılal Somaııamen ekijaqty kezdesý ótkizdi.
