Astanada múgedektigi bar balalarǵa arnalǵan aralas áleýmettik qyzmet modeli engiziledi
ASTANA. KAZINFORM — QR Eńbek jáne halyqty áleýmettik qorǵaý mınıstrligi múddeli memlekettik organdarmen jáne Astana qalasynyń ákimdigimen birlesip, arnaýly áleýmettik qyzmet kórsetý júıesin jańǵyrtýǵa baǵyttalǵan buıryq jobasyn qoǵamdyq talqylaýǵa shyǵardy. Bul týraly vedomstvonyń baspasóz qyzmeti málim etti.
Qujat aıasynda elordada pılottyq rejımde «aralas model» engizý josparlanyp otyr. Jańa tásil balalardyń jeke qajettilikterine beıimdelgen ıkemdi qyzmet kórsetý formatyn qalyptastyrýǵa baǵyttalǵan.
— Jobanyń negizgi maqsaty — múgedektigi bar balalardy tárbıelep otyrǵan otbasylar úshin qoldaý tetikterin barynsha yńǵaıly ári qoljetimdi etý. Buǵan deıin ata-analar kóbine úı jaǵdaıynda áleýmettik qyzmet alý men mamandandyrylǵan ortalyqtarǵa barýdyń birin tańdaýy mindetti bolsa, endi bul eki format ózara biriktiriledi. Jańa model aıasynda mamandar balamen úı jaǵdaıynda jumysyn jalǵastyrady. Sonymen qatar otbasylarǵa ońaltý kabınetteri men arnaıy ortalyqtarǵa barý múmkindigi beriledi. Onda balalar logoped, psıholog, defektolog sekildi mamandardan kómek alyp, qurdastarymen aralasyp, qajetti ońaltý sharalarynan óte alady, — delingen habarlamada.
Mundaı tásil balanyń ózine tanys otbasylyq ortada tárbıelenýin qamtamasyz ete otyryp, kásibı ortadaǵy zamanaýı qural-jabdyqtar men ońaltý ádisterine qol jetkizýine múmkindik beredi. Jobany iske asyrýǵa lıtsenzııasy bar úkimettik emes sektor uıymdaryn belsendi tartý kózdelip otyr. Bul ata-analarǵa qyzmet kórsetetin uıymdar men bilikti mamandardy óz tańdaýy boıynsha anyqtaýǵa múmkindik beredi.
— Pılottyq jobany júzege asyrý Astana qalasynyń ákimdigine júkteledi. Ákimdik jobaǵa qatysatyn ortalyqtardyń tizbesin aıqyndap, qarjylandyrýdy jergilikti bıýdjet esebinen qamtamasyz etedi. Elordada jınaqtalatyn tájirıbe arnaýly áleýmettik qyzmet kórsetý salasyndaǵy ulttyq zańnamany jetildirýge, shtattyq normatıvterdi jańartýǵa jáne búkil el boıynsha tarıf qalyptastyrýdyń jańa ári ádil tásilderin engizýge negiz bolady dep kútiledi, — dep habarlady mınıstrlikten.
Qujat jobasymen «Ashyq NQA» portalynda tanysyp, qoǵamdyq talqylaý aıasynda óz pikirińizdi bildirýge bolady.
Buǵan deıin múgedektigi bar tulǵalarǵa qyzmet kórsetetin jeke kómekshilerdiń jumys ýaqytyna jańa tártip engizilgenin jazdyq.
