Astanada múgedek balalar úshin beıimdelgen karate jáne júzý sektsııalary ashyldy

ASTANA. QazAqparat - «Astana-rýhy myqty jandardyń qalasy» jobasy aıasynda «Teń múmkindikter álemi» aktsııasy ótti. Shara kezinde múmkindigi shekteýli balalar aınalysatyn sporttyq sektsııalar usynyldy, dep habarlady elordalyq ákimdiktiń medıa ortalyǵy.

Qazirgi ýaqytta M. Ótemisov atyndaǵy Oqýshylar saraıynda múmkindigi shekteýli balalar aınalysatyn sporttyq sektsııalar -beıimdelgen karate jáne júzý úıirmesi jumys isteıdi.

Senbi kúni oqýshylar saraıyna «Teń múmkindikter álemi» aktsııasy aıasynda qala ákimi Áset Isekeshev, «Nur Otan» partııasy Astana qalalyq fılıaly tóraǵasynyń birinshi orynbasary Baqyt Saparov, úkimettik emes uıym ókilderi keldi.

Qonaqtar karate zalyn kórip, múmkindigi shekteýli balalardyń jattyǵýyn qarady. Sondaı-aq múgedek balalar júzetin basseıindi kórdi.

Sharanyń maqsaty - múmkindigi shekteýli balalardy buqaralyq sportqa tartý, beıimdi sportty damytý, oqý, bilim, medıtsınalyq jáne memlekettik mekemelerdi múgedekter ortasyna beıimdeý.

Sharany «Nur Otan» partııasynyń Astana qalalyq fılıaly, «Teń múmkindikter álemi» múgedektigi bar balalardyń ata-analar qaýymdastyǵy, «Asyl bala» respýblıkalyq assotsıatsııasy uıymdastyrdy.