Astanada mas kúıde kólik júrgizgen sýdıa ustaldy

ASTANA. KAZINFORM - Astanada túngi reıd kezinde polıtsııa qyzmetkerleri mas kúıinde kólik basqarǵan sýdıany ustady.

Astana qalasy Polıtsııa departamentiniń málimetinshe, patrýldik polıtsııa reıd kezinde Mazda markaly avtokóligin toqtatyp, júrgizýshiniń jaǵdaıyna kúmán keltirgen. Medıtsınalyq saraptama nátıjesinde áıeldiń alkogoldik mas kúıde bolǵany dáleldendi.

Tekserý barysynda júrgizýshiniń azamattyq ister jónindegi aýdanaralyq sottyń sýdıasy ekeni anyqtalǵan. Qazir ol saraptamaǵa jiberilip, avtokóligi aıyp turaǵyna qoıyldy.

-Avtokólik kommýnaldyq turaqqa qoıylyp, tekserý júrgizilip jatyr. Kólikti mas kúıinde basqarý – zańnyń óreskel buzylýy jáne aınaladaǵy adamdardyń ómiri men qaýipsizdigine qater tóndiredi. Mundaı quqyqbuzýshylyqtar qatań túrde toqtatylady, – dep málimdedi Astana qalasy Polıtsııa departamentiniń baspasóz qyzmeti.

Qazirgi ýaqytta ustalǵan azamatqa qatysty qyzmettik tekserý bastaldy.

Quqyq qorǵaý organdary atap ótkendeı, mas kúıinde kólik basqarý faktisi boıynsha jaýapkershilik barlyq azamattarǵa birdeı qoldanylady – zań aldynda eshkimniń artyqshylyǵy joq.

Eske salsaq, osyǵan deıin Ulytaý oblysy sot alqasynyń tóraǵasy para aldy degen kúdikpen ustalǵany jaıly habarlaǵan bolatynbyz. Boljam boıynsha, ol úshinshi tulǵa arqyly iri somany qoldy qylǵan.