Astanada latyn álipbıinde shyqqan kóne qazaq kitaptarynyń kórmesi ashyldy
«Latyn álipbıine kóshý bizge kóp qıyndyq týdyrmaıdy. Sebebi mektep esigin ashqan balalardyń barlyǵy latyn qarpin biledi. Endi keleshek urpaqqa ne kerek? Búgingi jazylǵan kitaptardyń eń keremetin ári qajettisin bárin latynǵa kóshiresizder degen senimdemiz. Latyn álipbıine kóshsek, búkil álemniń keńestigin ıgeremiz, ǵylymnyń tiline kóshemiz», - dedi kórmeniń ashylýy rásiminde memleket jáne qoǵam qaıratkeri Myrzataı Joldasbekov.
Óz kezeginde «Qazaqstan - 2050» jalpyulttyq qozǵalysy keńesiniń tóraǵasy Muhtar Mankeev bul jobany atalǵan qozǵalys pen QR Ulttyq akademııalyq kitaphanasy berlesip iske asyryp jatqanyn aıta kele, «Osy tektes sharalardy aldaǵy ýaqytta uıymdastyrýǵa daıynbyz. Bizdiń basty maqsatymyzdyń biri - ol jastar arasynda adamı kapıtaldy damytý. Kórmege qyzyǵýshylyq tanytqan barlyq azamattardy shaqyramyz. Ulttyq akademııalyq kitaphanasynda latyn qarpinde basylǵan 1,5 myńǵa jýyq kitap bar jáne olar ártúrli janrda jazylǵan», - dedi.
Sonymen qatar ol Astanada bastalǵan bul jobany elimizdiń ózge de oblystarynda jalǵastyrýǵa shaqyrdy.
Aıta keteıik, kitap kórmesinde sırek kitaptar qorynan 1929-1940 jyldar aralyǵynda latyn álipbıimen basylyp shyqqan qazaq zııalylarynyń shyǵarmalary, kórkem ádebıetter men balalarǵa arnalǵan kitaptar qoıylǵan. Onda Abaıdyń aýdarmalary men qara sózderi, óleńderi, sondaı-aq Іlııas Jansúgirov, Sáken Seıfýlın, Beıimbet Maılın, Muhtar Áýezov shyǵarmalary qamtylǵan. Qazaqstanda latyn álipbıi resmı túrde 1929-1940 jyldary paıdalanylyp, keıinnen kırıllıtsaǵa kóshirildi.
