Astanada Kreşenıe merekesine arnalǵan dinı is-shara ótip jatyr
ASTANA. KAZINFORM — 18 qańtardan 19 qańtarǵa qaraǵan túni pravoslav hrıstıandary basty dinı merekelerdiń biri — Kreşenıe Gospodne atap ótedi. Osyǵan baılanysty elordada qala turǵyndary men senýshilerdiń qatysýymen dinı is-sharalar ótip jatyr.
Dinı is-sharalar Ýspen kafedraldy soborynda (Kúıshi Dına kóshesi, 27), Konstantın-Elena shirkeýinde (Respýblıka dańǵyly, 12) jáne Serafım Sarov ǵıbadathanasynda (Bógenbaı batyr dańǵyly, 8) ótip jatyr.
Júzdegen elorda turǵyny men qala qonaqtary sýǵa túsý úshin jappaı shomylý oryndaryna jınaldy. Astanada mundaı shomylý oryndary Esil ózeniniń sol jaǵalaýynda, «Astanalyq» saıabaǵy jaǵalaýyndaǵy ortalyq jaǵajaı mańynda arnaıy muz oıyqtary jabdyqtalǵan.
Sýǵa túsý oryndary arnaıy is-sharadan keıin, saǵat 20:00–den bastap qoljetimdi bolyp, 19 qańtar kúni saǵat 02:00–ge deıin jumys isteıdi.
Shomylý oryndary qaýipsiz baspaldaqtarmen jáne qorshaýlarmen jabdyqtalǵan. Azamattardyń yńǵaıy úshin aýmaǵy jaryqtandyrylyp, jylyný pýnkteri uıymdastyrylǵan.
Qoǵamdyq tártip pen qaýipsizdikti qamtamasyz etý maqsatynda jaýapty qyzmetterdiń táýlik boıǵy kezekshiligi uıymdastyryldy. Qaýipsizdikke Tótenshe jaǵdaılar departamenti men Polıtsııa departamentiniń qyzmetkerleri tartylǵan. Sonymen qatar, sýǵa túsý oryndarynda jedel medıtsınalyq járdem brıgadalary kezekshilik etýde.
Qutqarý bólimsheleri sýdaǵy qaýipsizdik erejeleriniń saqtalýyn qadaǵalaıdy. Qajet bolǵan jaǵdaıda mamandar azamattardy jylyný pýnkterine ornalastyryp, medıtsınalyq kómek kórsetýge daıyn.
Aıta keteıik, dinı is-shara 19 qańtar kúni saǵat 23:00–ge deıin jalǵasady.
Aıta ketelik Qaraǵandyda Kreşenıe kezinde 21 arnaıy shomylý orny TJD baqylaýynda bolady.