Astanada qoıan-qoltyq urystan halyqaralyq týrnır bastaldy

ASTANA. QazAqparat - Búgin Astanada Qazaqstan Respýblıkasynyń Memlekettik kúzet qyzmeti Kýbogy úshin qoıan-qoltyq urystan halyqaralyq týrnır bastaldy. Atalmysh shara UOS-daǵy Jeńistiń 70 jyldyǵyna arnalady, dep habarlaıdy elorda ákimdiginiń baspasóz qyzmetinen.

Eki kún boıy Astana, Almaty, Qaraǵandy qalalary men Aqmola jáne Soltústik Qazaqstan oblystarynyń komandalary ózara sheberlik baıqasady. Sheteldik qatysýshylar tarapynan tatamıge Ázerbaıjan, Qyrǵyzstan, Tájikstan sportshylary shyǵady. Halyqaralyq týrnırdiń ashylýyna Astana qalasy ákiminiń orynbasary Ermek Amanshaev, QR Mádenıet jáne sport mınıstrligi sport jáne dene shynyqtyrý isi jónindegi komıtet tóraǵasy Elsııar Qanaǵatov, sondaı-aq Qazaqstannyń kúsh qurylymdarynyń ókilderi qatysty. Memlekettik kúzet qyzmetiniń basshysy Amantaı Kúreńbekovtyń aıtýynsha, týrnır elimizdiń óńirlerinde ótkizilgen barlyq sportyq sharalardyń qorytyndysy bolyp tabylady. «Shara Uly Otan soǵysyndaǵy Jeńistiń 70 jyldyǵy qarsańynda uıymdastyrylyp otyr. Atalarymyzdyń qaıtpas rýhy men umytylmas erligi bizge beıbit kúnderdi syılady. Sport bizdi kórshiles jatqan eldermen biriktiretin taǵy da bir múmkindik bolyp tabylady», - dedi A.Kúreńbekov. Jarysqa 115 sportshy qatysýda, olardyń arasynda álem chempıondary, halyqaralyq dárejedegi sport sheberleri, sport sheberligine kandıdattar bar. Elimizdiń kúsh qurylymdarynyń bilikti mamandary olarǵa qazylyq etýde.