Astanada kóshe qıylystary baǵdarshamdy ózi retteıtin «aqyldy» júıemen qamtamasyz etiledi

ASTANA. QazAqparat - Astanada 2019 jylǵa deıin 400 kóshe qıylysy «Intellektýaldy transporttyq júıemen» (ITS) qamtamasyz etiledi. Bul týraly búgin ótken baspasóz máslıhatynda «Astana LRT» JShS basqarma basshysy Talǵat Ardan aıtty.

«Júıege qosylǵan baǵdarshamdar ár 3 sekýnd saıyn baǵdarlama boıynsha jańalanyp otyrady. Baǵdarsham túsin ózgertýdiń belgili bir tsıkli bolmaıdy. Olar ózine deıingi baǵdarsham jibergen aqparatty qabyldap alyp, kólikterdiń tyǵyzdyǵyna baılanysty qajetti qyzyl ne jasyl tústi jaǵyp otyrady», - dep atap ótti T. Ardan.

Onyń málimetinshe, sonymen qatar, FLESHNET baǵdarlamasy qoǵamdyq kólikterdiń qozǵalysyna oraı olarǵa artyqshylyq berip otyrady. Árbir avtobýsqa navıgatordan basqa, onyń ár aıaldama arasyndaǵy ýaqytyn ólshep otyratyn qurylǵy bolady. Eger belgili bir avtobýs qajetti ýaqytynan keshigip kele jatsa, baǵdarsham oǵan jasyl jaryǵyn jaǵyp, ótkizip jiberedi.

«Al eger qıylystyń barlyq jaǵynan avtobýstar kelip qalsa, baǵdarsham solardyń arasynan eń kóp keshigip kele jatqanyn anyqtap, soǵan jol ashyp bere alady», - dep atap ótti T. Ardan.

Qazirgi ýaqytta Astanada 42 kóshe qıylysy osyndaı baǵdarshamdarmen jaraqtandyryldy. Olar Saryarqa, Turan dańǵyldary, Saraıshyq, Qonaev, Dostyq, Syǵanaq kóshelerine ornalastyrylǵan. Qazir olar testileý rejıminen ótkizilýde, al 30 sáýirden bastap 100 paıyzdyq júkteme boıynsha qyzmet atqaratyn bolady.

Aıta keteıik, atalǵan 40 kóshe qıylysyn ITS júıesimen qamtamasyz etýge 700 mln. teńge bólingen. Al jalpy jobanyń quny 22 mlrd. teńgege baǵalanyp otyr.