Astanada koreı balalary kıimderiniń kórmesi ashyldy

ASTANA. QazAqparat – Astanadaǵy Tuńǵysh Prezıdent mýzeıinde koreı balalarynyń dástúrli kıim úlgilerin kórsetetin kórme ashyldy, dep habarlaıdy QazAqparat.

Qazaqstandaǵy balalar jyly aıasynda Koreı mádenı ortalyǵy uıymdastyrǵan «Ata-ana mahabbaty» dep atalatyn kórmege koreı halqynyń 80-ge jýyq ulttyq balalar kıimi «hanbok» túrleri qoıylǵan.

Kórmeniń ashylý saltanatyna Koreıa Respýblıkasynyń Qazaqstandaǵy Elshisi Ký Hongsok myrza jáne eki eldiń mádenıet jáne óner qaıratkerlerimen qatar Qazaqstan Respýblıkasynyń dıplomatııalyq korpýsynyń ókilderi de qatysty. Olar balalar kıimderiniń evolıýtsııasy jáne koreı dástúrli kıimderiniń mádenıeti týraly aqparatty tyńdap, balalar kostıýmderiniń mádenıeti týraly bile aldy.

«Men Koreıa Respýblıkasy men Qazaqstan Respýblıkasy arasyndaǵy dıplomatııalyq qarym-qatynastardyń ornaǵanyna 30 jyl tolýyna oraı Qazaqstanda Choson áýleti dáýirinen bastap búgingi koreı dástúrli balalar kostıýmderiniń tarıhymen tanystyratyn «hanbokı» kórmesine qatysqanyma qýanyshtymyn. Bul kórme balalar kıiminde saqtalǵan ata-analardyń mahabbatyn, sondaı-aq ata-babalarymyzdyń óz urpaǵyna degen senim-tilegin sezinýge kómektesedi dep senemin», - dedi Elshi.

Aıta ketsek, atalǵan kórmeni 27 qyrkúıek pen 20 qarashaǵa aralyǵynda koreı mádenıetimen tanysqysy keletin astanalyqtar men elorda qonaqtary tamashalaı alady.