Astanada kópqabatty úıden shyqqan órt úsh saǵatta áreń sóndirildi

ASTANA. KAZINFORM — Tilsiz jaýmen kúreske tótenshe jaǵdaılar mamandarynan bólek, polıtsııa men jedel járdem qyzmeti tartylǵan. Tolyǵyraq Tótenshe jaǵdaılar mınıstrliginiń resmı ókili Dınara Nurǵalıeva aıtyp berdi. 

«180 sharshy metrdi sharpyǵan órt saǵat 18:06-da aýyzdyqtalyp, sóndirildi. TMJ mamandarynyń kómegimen 10 adam syrtqa shyǵaryldy, onyń ishinde 6 eresek jáne 4 bala bar. Keıbir turǵyndar órt aýmaǵynan ózderi shyǵyp úlgerdi. Qazirgi jaǵdaı boıynsha zardap shekkender joq. Sonymen qatar oqıǵa ornynda jedel járdem qyzmetkerleri men psıhologtar kómekke daıyn tur», — dedi Dınara Nurǵalıeva oqıǵa ornynda Kazinform agenttigi tilshisiniń saýalyna jaýap bere turyp. 

Onyń aıtýynsha, tilsiz jaýmen kúreske 90-nan astam órt sóndirýshi jáne 20 tehnıka jumyldyrylǵan. 

Sondaı-aq, TJM ókili qazir órttiń shyǵý sebebi anyqtalyp jatqanyn málim etti. 

Buǵan deıin agenttik tilshisi oqıǵa ornynan fotoreportaj jasaǵan edi.

Eske sala keteıik, búgin astanada kópqabatty úıdiń 26-qabatynan órt shyqty.

8 adam qaýipsiz jerge evakýatsııalanyp, arnaıy shtab quryldy.

Qutqarýshylar órtengen úıdiń árbir páterin tekserip jatyr.