Astanada kómir baǵasy qansha

ASTANA. QazAqparat – Elordada jylytý maýsymynda kómir jaǵý mólsheri azaıyp keledi. Bul týraly Astana qalalyq otyn-energetıkalyq kesheni jáne kommýnaldyq sharýashylyq basqarmasy otyn-energetıkalyq resýrstar bóliminiń basshysy Maqsat Esmaǵulov aıtty, dep habarlaıdy QazAqparat tilshisi.

«Qalamyzda kómir satatyn 14 oryn bar. Atalǵan oryndardy 109 nómirine habarlasyp, olardyń qaı jerde ornalasqanyn, qandaı kómir bar ekenin, baǵasyn bilýge bolady. Mundaı aqparat kúndelikti jańaryp otyrady. Astana qalasy men kórshiles Aqmola oblysyna qarasty eldi mekender gaz kelgenge deıin bir jylytý maýsymynda 500 myń tonna kómir tutynatyn. Gaz kelýine baılanysty bul kólem bıyl 364 myń tonnaǵa deıin qysqardy. Biraq, jylytý maýsymy ótkennen keıin ǵana qansha kómir tutynylǵanyn naqty aıta alamyz. Sebebi, kórshiles Tselınograd aýdanynda úı salý qarqyny joǵary», - dedi Astana qalalyq kommýnıkatsııalar qyzmetindegi brıfıngide.

Onyń dereginshe, 1 mamyr men 6 qyrkúıek aralyǵynda elordaǵa149 myń tonnasy jetkizildi.

«Qazirgi ýaqytta 14 kómir satatyn orynda 22 myń tonna bar. Ákimdik jyl saıyn kómir satý oryndarymen memorandým jasaıdy. ıAǵnı, qoımalardaǵy kómir baǵasy eshqashan óspeıdi. Búginde Shubarkól kómiriniń 1 tonnasy – 15 100, Qarajyra – 15 500, Maıkóbe 13 500 teńgeni quraıdy. Byltyrmen salystyrǵanda baǵa 1 myń teńgege ósti. Oǵan janarmaıdyń qymbattaýy, tasymaldaý, jumysshylarǵa jalaqy tóleý syndy jaıttar sebep boldy», - dedi Maqsat Esmaǵulov.