Astanada qoqysty shyǵarý marshrýttaryn ońtaılandyrý úshin jasandy ıntellekt paıdalanylady
ASTANA.KAZINFORM — Astanada ruqsat etilmegen qoqystardy joıý jumysy qyzý júrip jatyr. Qalanyń ár aýdanynda zań buzýshylyqtardy anyqtaý úshin turaqty monıtorıng júrgiziledi. Bul týraly Astana qalasy ákimdiginiń baspasóz qyzmeti habarlady.
Stıhııalyq polıgondarmen kúres tek joıý arqyly ǵana emes, sonymen birge kúsheıtilgen baqylaý jáne quqyq buzýdy jaýapqa tartý arqyly da júzege asyrylady. Qalada mobıldi toptar men zań buzýdy tirkeıtin iKomek júıesi belsendi jumys isteıdi.
— 2025 jyldyń basynan beri Baıqońyr aýdanynda 7 ruqsat etilmegen qoqys orny anyqtalyp, tazartyldy, ol oryndardan 230 tonna qoqys shyǵaryldy. Saryarqa aýdanynda da osy jyldyń alǵashqy aılarynda 7 ruqsat etilmegen qoqys orny anyqtaldy, onyń 6-aýy joıyldy. Jumys barysynda 115 tonnadan astam qurylys jáne turmystyq qaldyqtar shyǵaryldy. Aýa raıy jylynǵan ýaqyttan bastap Esil aýdanynda 2000 tonna qoqys shyǵaryldy, — delingen ákimdik habarlamasynda.
Saraıshyq aýdanynda sáýir aıynyń sońyna deıin 4 ýchaskeni joıý josparlanǵan. Mysaly, atalmysh aýdanda dron kómegimen zańbuzýshylyq anyqtaldy. Las sýdy tógý sáti dron kómegimen anyqtaldy, bul keıinnen málimetter (tehnıkanyń memlekettik nómiri) odan ári sheshim qabyldaý úshin quqyq qorǵaý organdaryna jiberildi. Aýdan ákimdigi men ekologııalyq polıtsııa qyzmetkerleriniń úılesimdi jumysynyń arqasynda zańbuzýshy 20 mınýt ishinde anyqtaldy. Arnaıy tehnıkanyń júrgizýshisi las sýdy tókkeni jáne qorshaǵan ortany lastaǵany úshin birneshe ret jaýapqa tartyldy. Júrgizýshige 145 484 teńge aıyppul salyndy. Tehnıka aıyp turaǵyna qoıyldy.
— 2025 jyly Nura aýdanynda 4 orynnan 57 tonna qoqys shyǵaryldy. Merdiger uıymdardyń kúshteri Turan, Uly dala dańǵyldarynyń jáne Sh. Aıtmatov kósheleriniń boıyndaǵy ýchaskelerge jumyldyryldy. Qalalyq senbilikter kezinde ruqsat etilmegen polıgondardy joıý jumysyna qurylys kompanııalaryn tartý josparlanyp otyr. Júrgizilgen monıtorıng barysynda Almaty aýdanynda ruqsat etilmegen qoqys úıindileri anyqtalǵan joq, — delingen habarlamada.
Budan basqa, kommýnaldyq qaldyqtardy anyqtaý úshin tsıfrlyq kartany engizý jáne qoqysty shyǵarý marshrýttaryn ońtaılandyrý úshin jasandy ıntellektti paıdalaný josparlanyp otyr. Bul qoqystardyń shyǵarylýyn baqylaýǵa jáne polıgondardyń aldyn alýǵa múmkindik beredi.
Esterińizge sala keteıik, osy jyldyń 13 naýryzynda «Ákimshilik quqyq buzýshylyq týraly» kodekstiń 344-babyna ózgerister engizildi, oǵan sáıkes belgilenbegen oryndarda qoqys tastaǵany úshin jaza kúsheıtildi.
Aıta ketelik Bektenov Almatyda qoqys óńdeý zaýytyn salý týraly kelisim jobasyn shuǵyl daıyndaýdy tapsyrǵan edi.