Astanada qoǵamdyq Wi-Fi bar 18 oryn ashylady

ASTANA. QazAqparat - Elorda basshylyǵy EXPO-2017 halyqaralyq mamandandyrylǵan kórmesi aıasynda energııanyń balamaly kózderin damytý boıynsha jobany júzege asyrýda. Elordada Wi-Fi jelisin taratatyn 18 oryn ashý josparlanyp otyr, dep habarlaıdy elorda.info .

Bul nysandar balamaly energııa qýatyn paıdalaný arqyly jumys isteıtin bolady. Sondaı nysannyń biri - kúnniń kózi men jeldiń qýatyn paıdalaný arqyly júmys isteıtin kıiz úı bóligi sıpatyndaǵy qondyrǵy.

«Bul jerde meımandar tek demalyp qana qoımaı, uıaly telefonnan bastap basqa da gadjetterin qýattaı alady. Atalǵan qondyrǵy Qazaqstanda jasalǵan  - bizdiń qanatqaqty jobamyz. Ony tek jazdyń kezinde ǵana emes, qysta da, ıaǵnı jyldyń ár mezgilinde paılanaýǵa bolady. Eger elorda halqynyń kóńilinen shyǵyp jatsa, qondyrǵylar qalanyń basqa da aýdandarynda paıda bolady», - dedi Astana qalasy Energetıka basqarmasynyń ókili Rýstam Qadyrov elorda ákimdiginiń medıa ortalyǵynyń tilshilerine.

Onyń aıtýynsha, qondyrǵy beınebaqylaýmen qamtylǵan.

«Atalǵan orynda beınebaqylaý kamerasy bar. Ondaǵy barlyq jazba Oqýshylar saraıynyń dıspetcherlik tetigine jiberiledi. Astana turǵyndary atalǵan qondyrǵyǵa uqyptylyqpen qaraıdy dep úmittenemiz. Sebebi, bul jańashyldyq qala turǵyndary men qonaqtaryna barynsha jaıly bolýy úshin jasalyp jatyr», - dedi R.Qadyrov.