Astanada Qoǵamdyq keńesterdiń alǵashqy respýblıkalyq májilisi ótip jatyr
Eske sala ketsek, 2016 jyly "100 naqty qadam" Ult josparyn júzege asyrý aıasynda memlekettik organdar men azamattyq qoǵam arasyndaǵy dıalogtyń nysany retinde Qoǵamdyq keńester qurylǵan edi. Qoǵamdyq keńester - halyq pen bılik arasyn dánekerleýshi, bılik pen qoǵamdy baılanystyrýshy qurylym. Olar ákimder men mınıstrlerdiń esepterin tyńdap, san alýan máselelerdi sheshýge atsalysady.
Búgingi májiliste qoǵamdyq keńester tájirıbesi jáne memleket pen qoǵamnyń ózara árekettesý tetikteri talqylanatyn paneldik jáne plenarlyq otyrystar ótedi. Oǵan QR Parlamenti Senaty tóraǵasynyń orynbasary Bektas Beknazarov, QR Premer-Mınıstriniń orynbasary Erbolat Dosaev, QR Din isteri jáne azamattyq qoǵam mınıstri Nurlan Ermekbaev, BUU Damý baǵdarlamasynyń Qazaqstandaǵy Turaqty ókiliniń orynbasary Mýnhtýıa Altangerel jáne qoǵamdyq keńester men sarapshylar qaýymdastyǵynyń ókilderi, memlekettik organdar men halyqaralyq uıym basshylary, jalpy sany 500 delegat qatysýda.
Sharanyń ashylý saltanatynda QR Premer-Mınıstriniń orynbasary Erbolat Dosaev QR Premer-Mınıstri Baqytjan Saǵyntaevtyń quttyqtaý hatyn oqyp berdi.
"Barshańyzdy qoǵam, Parlament jáne atqarýshy bılik ókilderiniń basyn biriktirgen І respýblıkalyq qoǵamdyq keńester májilisiniń ótýimen quttyqtaımyn. Búgingi tańda "100 naqty qadam" Ult josparyn júzege asyrý aıasynda túrli deńgeıde 229 Qoǵamdyq keńes quryldy, olardyń quramynda 4 myńnan astam adam qyzmet etedi. Qoǵamdyq keńester qyzmeti memlekettik organdardyń jumysynda ashyqtyq pen bılikke degen senim deńgeıin ulǵaıtýǵa, iske asyrylyp jatqan memlekettik baǵdarlamalar men bastamalar týraly jarııalylyqty arttyrýǵa, sondaı-aq azamattardyń memlekettik basqarýǵa keńinen qatysýyna múmkindik berdi. Búgingi májilistiń syndarly oı men salıqaly pikir almasý, tájirıbe bólisý alańynyń bastaýy bolatynyna úlken úmit artamyn. Respýblıkalyq qoǵamdyq keńester májilisi qoǵamdyq-saıası jáne áleýmettik-ekonomıkalyq protsesterdi damytýǵa úles qosyp, memlekettik jáne qoǵamdyq ınstıtýttardyń tıimdi jumys isteýine jańa serpin beretinine senimdimin", - delingen quttyqtaý hatynda.
Atap ótken jón, Qazaqstanda respýblıkalyq jáne jergilikti deńgeıde 229 qoǵamdyq keńes jumys isteıdi (16 respýblıkalyq, 213 óńirlik). Qoǵamdyq keńes qurylǵan sátten beri 213 oblys, qala jáne aýdan ákimderiniń, 16 ortalyq jáne 1300-den astam jergilikti atqarýshy organ basshylarynyń esepteri tyńdaldy, 600-den astam ózekti máseleler qoǵamdyq tyńdaýlardan ótken jáne 9 myńnan astam normatıvti aktiler jobalaryna usynystar engizilgen.
Búgin І respýblıkalyq qoǵamdyq keńester májilisiniń qorytyndysy boıynsha qatysýshylardyń naqty sheshimderi men usynystary negizinde arnaıy qarar qabyldanady.
